Abaı oblysynda polıtseı órtengen úıden áıel adamdy qutqaryp qaldy

SEMEI. KAZINFORM – Abaı oblysy Kókpekti aýdanynda polıtseı otqa oranǵan jer úıden áıel adamdy aman alyp shyqty. 

13 jeltoqsanda túngi saǵat 02.00 shamasynda Kókpekti aýdandyq PB krımınaldyq polıtsııa bóliminiń bastyǵy Rasýl órtenip jatqan úıdi baıqap, dereý kómekke umtylǵan.

- Qaqpadan ótken ol ottyń úı shatyryna jaıylyp bara jatqanyn kórdi. Bir qolymen órt sóndirý qyzmetine qońyraý shalyp, ekinshi qolymen úıdiń terezeleri men esigin qaǵyp, úı ıesin oıatýǵa kirisken, - dep habarlady oblystyq polıtsııa departamentinen. 

Al uıyqtap jatqan 35 jastaǵy áıel bolǵan jaǵdaıdan múlde beıhabar edi. Polıtseıdiń jedel áreketiniń arqasynda ol aman qalyp, úı múlkiniń basym bóligi saqtaldy. Birneshe mınýttan keıin órt sóndirýshiler kelip, tilsiz jaýdy aýyzdyqtady. 

- Úıimniń órtenip jatqanyn bilmedim de. Eger polıtsııa qyzmetkeri bolmaǵanda, jaǵdaıdyń nemen aıaqtalatynyn elestetýdiń ózi qorqynyshty. Ol meni jáne úıimdi saqtap qaldy. Col úshin alǵysym sheksiz!, - deıdi aýyl turǵyny.

Eske salsaq, osyǵan deıin Atyraýda polıtseıler joǵary qabattan sekirmek bolǵan áıeldi qutqarǵany habarlanǵan.