Abaı oblysynda patsıentterge ota kezinde merzimi ótip ketken narkoz salǵan

SEMEI. KAZINFORM — Maqanshy aýdanynyń prokýratýrasy densaýlyq saqtaý mekemesin tekserý barysynda dári-dármekpen qamtamasyz etýde kóptegen zańbuzýshylyqty anyqtady.

Tekserý barysynda dári-dármektiń durys saqtalmaýy, quramynda esirtki bar ampýlalardyń ýaqtyly joıylmaýy jáne dári-dármekterdiń durys taǵaıyndalmaýy sekildi faktiler áshkere boldy. 

Sonymen qatar, ota jasaý kezinde naýqastarǵa merzimi ótip ketken «Ketam» anestezııa (narkoz) preparattaryn qoldaný faktileri oryn alǵan.

Prokýratýra qabyldaǵan sharalardyń nátıjesinde medıtsınalyq mekemeniń 12 qyzmetkeri tártiptik jazaǵa tartylyp, 12 tulǵaǵa QR ÁQBtK-niń 426-baby boıynsha 1,5 mln teńgeden astam ákimshilik aıyppul salyndy.