Borodýlıha aýdanynda ózenniń sýy tasyp, 50 úıdiń aýlasyna jaıyldy

SEMEI. KAZINFORM - Abaı oblysy Borodýlıha aýdany Peremenovka aýylynda qardyń qarqyndy erýinen Era ózeninde sý deńgeıi kóterildi. 

Ózen arnasynan sýdyń shyǵýy saldarynan Pervomaı kóshesiniń boıyndaǵy 50 aýla aýmaǵyn sý basqan. Úılerge sý kirgen joq

19 adamdy evakýatsııalaý sharalary júrgizilgen bolatyn, onyń ishinde 6 bala bar. Qazirgi tańda barlyq turǵyndar úılerinde.

Oqıǵa ornynda tótenshe jaǵdaılar departamentiniń, JAO, APB, ortalyq aýdandyq emhananyń jáne AES kúsh-quraldarynan 44 adam jáne 7 tehnıka jumys atqaryp jatyr.

Pervomaı jáne Bolashaq kósheleri baqylaýǵa alynǵan. Úılerdi sý baspas úshin ınertti materıaldar tóselýde.

JAO Era ózeninde jaǵalaýdy bekitý jumystaryn júrgizýde, barlyǵy 400 qap 500 tonna ınertti materıal tóseldi.

Tótenshe jaǵdaılar qyzmeti úılerdi aralap, turǵyn úılerdiń sý baspaýyn tekserýde.

Talan-tarajǵa jol bermeý jáne qoǵamdyq tártipti qamtamasyz etý maqsatynda Borodýlıha APB patrýlder uıymdastyrdy.

«Qazirgi tańda Pervomaı jáne Bolashaq kósheleriniń boıynda sý deńgeıi tómendep, aýla aýmaqtary men turǵyn úılerdi sý basý qaýpi joq. Borodýlıha aýdanyndaǵy sý tasqyny jaǵdaıy erekshe baqylaýda» dep habarlady oblys ákimdiginen.