Abaı oblysynda ótken IT-festıvalde 90-ǵa jýyq Startup joba tanystyryldy
Abaı oblysynda aýqymdy IT-festıval ótti, dep habarlaıdy Kazinform.
Abaı oblysy ákimdiginiń málimetine súıensek, oqýshylar men stýdentter arasynda IT salasyndaǵy úzdik ınnovatsııalyq jobalar men tsıfrlyq tehnologııalar tanystyrylatyn «Steam fest «Digital Abai» atty óńirlik IT-festıval ótti.
«Mundaǵy maqsat – óskeleń urpaqty ǵylymı-tehnıkalyq shyǵarmashylyqqa baýlý, oqýshylar, stýdentter men pedagogterdiń úzdik IT-sheshimderin anyqtaý, qoldaý, jańa ınnovatsııalyq tehnologııalardy usyný jáne pedagogterdiń kásibı quzyrettiligin arttyrý. Іs-sharaǵa Astanadaǵy CEO Yessen&Co ókili Azat Esenov, «Neırondyq jeliler ortalyǵynyń» Promt-engineer Danıal Temirhanov, Almatydaǵy Developer Relations Coordinator for Google Developers (GDG CentralAsia) ókili Askar Aıtýov, Úndistandaǵy jasandy ıntellektke negizdelgen tehnıkalyq ónim Asambhav menedjeri Shreıa Mechta, Semeı qalasyndaǵy Freedom Broker kompanııasynyń óńirlik dırektory Abzal Askarov, Abai IT-Valley tehnologııalyq klasteriniń dırektory Baýyrjan Naýryzbaev, «Óner» 3d baspa stýdııasynyń jetekshisi Anet Týrsynjan, «DR.Web-Ortalyq Azııa» tehnıkalyq dırektory Artýr Shıshıga shaqyryldy», - delingen aqparatta.
Jıyndy Abaı oblysy ákimdigi apparatynyń basshysy Jasulan Sársebaev quttyqtaý sózimen ashty.
«Búgingi IT-festıval oblysta bilim berýdi tsıfrlandyrýdy damytýǵa qundy úles qosatynyna jáne ІT baǵyttyń tanymaldyǵynyń ósýine yqpal etetinine senimdimin. Sondyqtan osyndaı festıvalderdiń mańyzy zor», - dedi apparat basshysy.
«Startup jobalar» baǵyty boıynsha oblys ákimi grantyna úmitker 13 qatysýshy óz jobalaryn usyndy. Festıvalda 8 sektor boıynsha barlyǵy 90-ǵa jýyq Startup joba tanystyryldy.
Festıval aıasynda 20 qatysýshy 1-oryn, 19 qatysýshy 2-oryn, 18 qatysýshy 3-oryn ıelense, arnaıy kýbokty Semeı qalasy men Jarma, Úrjar aýdandarynan kelgen komandalar jeńip aldy.
Aıta keteıik, alǵash uıymdastyrylǵan «Digital Abai» IT-festıvaline aımaq boıynsha 2000-ǵa jýyq qatysýshy jınaldy.
