Abaı oblysynda órtengen úıden 34 jastaǵy er adamnyń denesi tabyldy

SEMEI. KAZINFORM – Abaı oblysy Borodýlıha aýdanynda órtengen úıden 34 jastaǵy er adamnyń denesi tabyldy.

Oblystyq Tótenshe jaǵdaılar departamenti baspasóz qyzmetiniń málimetine súıensek, órt 26 tamyzda túngi ýaqytta Borodýlıha aýdanyndaǵy jer úıde shyqqan.

«Órt sóndirýshiler oqıǵa ornyna shuǵyl kelip jetti. Úıdi sharpyǵan órt qosalqy ǵımarat pen kólikke de jaıylyp ketti. Aldyn ala derek boıynsha órtengen aýmaq 400 sharshy metrdi quraǵan», - delingen aqparatta.

Qutqarýshylar úı ishinen er adamnyń denesin tapty. Anyqtalǵandaı, ol 34 jastaǵy úı ıesi.

Kóp uzamaı qyzyl jalyn tolyqtaı aýyzdyqtaldy. Qazirgi ýaqytta órttiń shyǵý sebebi anyqtalyp jatyr. 

Osyǵan deıin ShQO men Almaty oblysynda 26 tonna shóp órtenip ketkeni habarlandy.