Abaı oblysynda ortasha jalaqy kóterildi
Abaı oblysy óziniń alǵashqy jylynda áleýmettik-ekonomıkalyq kórsetkishter boıynsha senimdi ósim kórsetip otyr. Bul týraly óńir ákimi Nurlan Uranhaev elordadaǵy esep berý brıfınginde aıtty, dep habarlaıdy Kazinform.
«Alǵashqy jylymyz áleýmettik-ekonomıkalyq damý turǵysynan oń serpinge ıe. Jyl kóleminde aı saıyn barlyq ındıkatorlar boıynsha turaqty ósim saqtalýda. Búgingi tańda óńirdiń qysqa merzimdi ekonomıkalyq ındıkatory 107,5%-dy qurady. Negizgi kapıtalǵa salynǵan ınvestıtsııalar 44,2%-ǵa ósip, 426,2 mlrd teńgege jetti», — dedi Nurlan Uranhaev Astanadaǵy ortalyq kommýnıkatsııalar qyzmetinde.
Ákimniń aıtýynsha, qurylys salasynda ósim 141,1%-ǵa, ónerkásipte — 106,3%-ǵa, ishki saýdada — 103%-ǵa, aýyl sharýashylyǵynda — 101,7%-ǵa jetti.
Sonymen qatar, 233,8 myń sharshy metr turǵyn úı paıdalanýǵa berildi (ósim 108%), bul 2 443 otbasyn turǵyn úımen qamtamasyz etýge múmkindik berdi.
«Óndiris qarqyny áleýmettik kórsetkishterge de oń áserin tıgizdi. Ortasha aılyq jalaqy 17,6%-ǵa ósip, 292,8 myń teńgeni qurady. Oblys bıýdjetiniń óz kiristeri 141%-ǵa ósip, qazynaǵa 87,4 mlrd teńge túsirdi. Bıyl oblys bıýdjetiniń kólemi 419,2 mlrd teńgeni qurady. Bilim berý salasy boıynsha shyǵystar 1,2 esege, densaýlyq saqtaý — 2 esege jáne aýyl sharýashylyǵy 7 esege ósti», — deıdi ákim.
Al oblys ortalyǵy Semeı qalasynyń bıýdjeti 103,1 mlrd teńgeni qurady, bul ótken jyldan 51,4%-ǵa artyq.
Turǵyn úı-kommýnaldyq sharýashylyq salasyn qarjylandyrý kólemi 2 esege jáne áleýmettik qorǵaý kólemi 23%-ǵa ulǵaıǵan.
«Prezıdent tapsyrmasymen Abaı oblysynyń 2023-2027 jyldarǵa arnalǵan áleýmettik-ekonomıkalyq damýynyń Keshendi jospary Úkimet qaýlysymen bekitildi. Ondaǵy ınvestıtsııa kólemi 1,9 trln teńge jáne 102 is-shara qarastyrylǵan. Bıyl 89,2 mlrd teńgege 45 is-sharany júzege asyrý jumystary bastaldy. Bes jylǵa arnalǵan ınvestıtsııalyq jobalar pýly jasaqtaldy. Oǵan 8 myń jumys ornyn qamtıtyn 1,4 trln teńgeniń 44 jobasy endi. Bıylǵa 600 jańa jumys orny bar úsh joba iske qosyldy, quny — 19,1 mlrd teńge», — dedi Abaı oblysynyń ákimi.
Buǵan deıin Nurlan Uranhaev Aıagózde órt saldarynan tórt balasynan aıyrylǵan otbasyǵa qandaı kómek kórsetilgenin aıtqan edi.
