Abaı oblysynda óńirdiń órkendeýine eńbek sińirgen azamattarǵa qurmet kórsetildi
SEMEI. KAZINFORM - Abaı oblysynda Respýblıka kúnine arnalǵan «Qyran elim – Qazaqstanym!» atty saltanatty shara ótti. Semeı qalasyndaǵy Abaı teatrynda ótken merekelik jıynǵa oblys ákimi Berik Ýálı qatysty.
Aımaq basshysy quttyqtaý sóz sóılep, óńir turǵyndaryn ulttyq merekemen quttyqtady.
«Barshańyzdy elimizdiń eń ulyq merekesi – Respýblıka kúnimen shyn júrekten quttyqtaımyn! Bıyl elimizdiń egemendik deklaratsııasyn qabyldaǵanyna 35 jyl tolyp otyr. Prezıdentimiz Táýelsizdiktiń bastaýynda turǵan osy qasterli datanyń mańyzyn arttyryp, qaıta jańǵyrtty. Oblysymyzdyń shırek ǵasyrdan keıin qaıta qurylyp, tarıhı ádilettiliktiń saltanat qurýy tikeleı Memleket basshysynyń qamqorlyǵy ekeni barshaǵa belgili. Óńirdiń jańadan qurylǵanyn eskere otyryp, aımaǵymyzdyń qarapaıym eńbek adamdaryna qurmet kórsetý maqsatynda Prezıdentimiz Abaı oblysyna aıryqsha nazar aýdaryp, memlekettik marapattyń lımıtin eki esege kóbeıtip otyr. Sonyń arqasynda oblysymyzdyń eńbek sińirgen azamattary qurmettiń tórine shyqty», - dedi aımaq basshysy.
Eren eńbekterimen qurmet tórine shyqqan azamattardyń qatarynda túrli sala ókilderi bar. «Baqyrshyq taý-ken óndirý kásiporny» JShS basqarma tóraǵasy, eńbek ardageri, belgili metsenat Keńbeıil Isaev 1 dárejeli «Barys» ordenin, «Semeı tsement zaýyty» JShS óndiristik kesheniniń shahtalyq jáne aınalmaly peshterdiń aǵa mashınısi Rahat Baılov «Eren eńbegi úshin» medalin Prezıdenttiń qolynan aldy.
Shara barysynda Abaıdyń 180 jyldyq mereıtoıyn atqarýda aıryqsha eńbek etken belgili aqyn Tólegen Janǵalıev «Parasat» ordenimen nagradtaldy. Abaı atyndaǵy teatrdyń belgili aktrısasy Baqyt Toıymbaeva men talantty akter Bekzat Omashev «Qazaqstannyń eńbek sińirgen qaıratkeri» ataǵymen marapattaldy. Aıta keterligi, mundaı ataq kóp jyldan beri oblys ónerpazdaryna berilmegen bolatyn.
Kókpekti aýdanyndaǵy belgili eńbek adamy, aýyl sharýashylyǵy salasynyń ardageri Vladımır Vınıchýkke, óńirimizdegi talaı býyn telejýrnalısterdiń ustazy, «Baıýaqov TVK-6» telarnasynyń dırektory Omarbek Baıýaqovqa, Semeı et kombınatyna kólemdi ınvestıtsııa salyp, óńir ekonomıkasynyń damýyna eleýli úles qosyp kele jatqan belgili kásipker, metsenat, «EURASIA RED» kompanııalar tobynyń prezıdenti Erlan Muqashevqa, túrli áleýmettik jobalarǵa únemi qoldaý kórsetip kele jatqan kásipker, Abaıdyń 180 jyldyǵyn atap ótýde eleýli eńbek etken metsenat Aleksandr Solovevke jáne jol salasynyń bilikti mamany Serikjan Aıkelevke «Qurmet» ordeni tapsyryldy.
Jıynda óńirdiń áleýmettik-ekonomıkalyq, mádenı-rýhanı damýyna, densaýlyq, bilim salalaryna úles qosyp júrgen birqatar eńbek adamdaryna «Eren eńbegi úshin», «Shapaǵat» tósbelgileri tabys etildi.
Sondaı-aq, oblysta uzaq jyl eńbek etip, aımaqtyń damýyna úles qosqan óńirimizdiń birqatar azamatyna alǵash ret «Abaı oblysyna sińirgen eńbegi úshin» tósbelgisi berildi.
Saltanatty jıyn merekelik kontsertke ulasty. QR eńbek sińirgen qaıratkeri Dosymjan Tańatarov, Zarına Omarova, Móldir Áýelbekova, «Jigitter» kvartetiniń solısti Myrzahan Maqanov, oblystyq fılarmonııa ártisteri men M.Tólebaev atyndaǵy mýzykalyq ýchılşesiniń stýdenttik hory, Abaı oblysy ákiminiń estradalyq-sımfonııalyq orkestri kórermenge erekshe kontserttik baǵdarlama usyndy.
