Abaı oblysynda óńirdiń damýyna úles qosqan azamattar marapattaldy
Respýblıka kúni qarsańynda Semeıde birlikti, egemendik pen patrıotızmdi aıqyndaıtyn merekelik kontsert uıymdastyryldy, dep habarlaıdy Kazinform.
Abaı oblysynyń ákimi Nurlan Uranhaev Respýblıka kúniniń basty memlekettik mereke retindegi mańyzdylyǵyn atap ótti.
«Prezıdentimiz – Qasym-Jomart Kemeluly Toqaevtyń, osy sahna tórinde - «Otanymyz – bir, memleketimiz – bir, halqymyz – bir, sondyqtan árqashan birge bolaıyq!» - degen sózi – bizdiń ómirlik qaǵıda, buljymas aksıoma, baqytty ómir súrýdiń formýlasy bolýy kerek! Búgin, Aqordada, Memleket basshysy Abaı oblysynan 3 jerlesiterimizdi joǵary memlekettik nagradalarmen marapattady. Búgingi jıynda da oblysymyzǵa eńbegi sińgen jerlesterimiz memlekettik nagradalarmen marapattalady. «Arǵy-bergi tarıhta» Abaı elinen osynsha adamnyń marapattalýy bolǵan emes! Osynyń barlyǵy derbes oblys bolýymyzdyń nátıjesinde múmkin bolǵan, ortaq qýanyshymyz!» - dedi oblys ákimi Nurlan Uranhaev.
Saltanatty shara aıasynda óńirdiń damýyna úles qosqan azamattarǵa marapat pen «Qurmet» gramotasy tabys etildi. Marapat ıeleriniń ishinde bilim jáne medıtsına salasynyń ardagerleri, memlekettik qyzmetkerler, muǵalim, ǵalym, mýzykant, aýyl sharýashylyǵy salasynyń qyzmetkerleri men kásipkerler bar.
Sondaı-aq, óńir ónerpazdary kórermenderge ulttyq naqyshtaǵy qoıylym men erekshe daıyndalǵan kontserttik baǵdarlama usyndy. Olardyń qatarynda Ámire Qashaýbaev atyndaǵy memlekettik fılarmonııasy, Abaı atyndaǵy Qazaq ulttyq opera jáne balet teatrynyń ónerpazdary jáne oblystyq estradalyq-sımfonııalyq orkestri, QR eńbek sińirgen ártisteri bar.
Eske salsaq, erteń Abaı oblysynyń qala jáne aýdandarda ulttyq merekege arnalǵan júzden astam is-shara men merekelik kontsert ótedi.
