Abaı oblysynda oqýshy ınfraqurylym men týrızmdi jaqsartatyn AR-veb qosymshasyn ázirledi
SEMEI. KAZINFORM – Semeı qalasynyń 11-synyp oqýshysy Nurlyhan Maratov qalalyq ınfraqurylymdy damytýǵa baǵyttalǵan biregeı AR-veb qosymshasyn jasap shyǵardy. Bul ınnovatsııalyq joba «Aqyldy qala» baǵdarlamasy aıasynda júzege asyrylyp, qalanyń ınfraqurylymyn jobalaý jáne josparlaý tásilderin túbegeıli ózgertýdi kózdeıdi.
AR tehnologııasyna negizdelgen qosymsha bolashaqta qurylys jumystaryn az shyǵynmen júzege asyrýǵa múmkindik beredi. Paıdalanýshylar mobıldi qurylǵylar arqyly jobalardyń 3D-modelderin qarap, QR-kodty skanerleý arqyly bolashaq ǵımarattardyń nemese eskertkishterdiń úshólshemdi modelin shynaıy ortada kóre alady. Sonymen qatar olar nysandardyń árbir elementin barlyq jaǵynan baǵalaı alady. Ol arqyly turǵyndar qala qurylysy sheshimderine qatysa alady. Mysaly, eskertkishter men ǵımarattardyń qurylysyn qoldap, daýys berýge jáne olardy júzege asyrýǵa qarjylaı qoldaý kórsetýge múmkindikteri bar.
«Men bul jobany tek tehnologııalardy damytý úshin emes, adamdardyń ómirin jaqsartý úshin de jasadym. Qala turǵyndarynyń óz qalasymen tyǵyz baılanys ornatyp, onyń damýyna qatysýy óte mańyzdy dep sanaımyn. Qosymshada qalanyń kórikti jerleri týraly aqparattyq jáne oıyn-saýyq mazmundaǵy vırtýaldy gıd-chat-bot bar. Bul fýnktsııa qalalyq ınfraqurylymmen ózara árekettesýdi jeńildetedi: qoldanýshylar kafelerde aldyn ala oryn alyp, emhanalarǵa jazyla alady jáne týrıstik nysandardy tamashalaý múmkindigine ıe bolady. Sonymen birge qosymsha aýa raıy boljamyn, jol qozǵalysy týraly ózekti aqparatty usynady», - deıdi Nurlyhan.
Nurlyhannyń jobasy áli de damý ústinde. Jaqyn arada «Aqyldy kólik» júıesimen ıntegratsııalaný jáne qosymshany Qazaqstannyń basqa qalalarynda qoldaný múmkindikteri keńeıtiledi. Sonymen qatar sáýlet, dızaın jáne qalalyq josparlaý salalaryna arnalǵan bilim berý quraldaryna qosymshany engizý josparlanyp otyr.
Aıta ketý kerek, Nurlyhan buǵan deıin QEFO.KZ, TableTech jobalarynyń jáne Discover Abai týrıstik qosymshasynyń avtory retinde tanyldy.
