Abaı oblysynda «Móldir bulaq» aptalyǵy jalǵasýda
SEMEI. KAZINFORM - Jarma aýdanynda «Taza Qazaqstan» respýblıkalyq eko-aktsııasy aıasynda «Ózen-sý – ólke ajary» is-sharasy ótti.
Basty maqsat – óskeleń urpaqty týǵan ólkeniń qorshaǵan ortasy men tabıǵı resýrstaryna uqypty qaraý dástúrlerine tárbıeleý.
Aktsııaǵa 50-den astam eriktiler, belsendiler, mekemeler, uıym qyzmetkerleri, aýdan turǵyndary qatysty. Aktsııa aıasynda sý qoımanyń jaǵasyndaǵy qoqys, turmystyq qaldyqtar jınaldy.
Aýdanda 30-dan astam ózen bar. Ońtústiginen soltústigine qaraı aǵyp jatqan sýdyń negizgi kózi – Shar ózeni. Bul ózen Qarajal bıiktiginen bastaý alady. Onyń jalpy uzyndyǵy – 259 shaqyrym, sý jınaý alańy – 14 900 km. Saryarqa men Qalba jotasynyń shekarasynan Aqshy aýylynyń janyndaǵy Ertiske quıady. Sý – tuşy. Ózenniń negizgi kanalyna aýdan jerlerindegi birneshe salalar irgeles.
Jazda sý qoımasynyń aýmaǵynda demalýshylar sany jyl saıyn artyp keledi. Olardyń ishinde tabıǵatqa nemquraıly qaraıtyndar kóp, sonyń saldarynan sý qoımasynyń jaǵasynda shyny bótelkeler, konserviler jáne basqa da qaldyqtar jınalmaı jatady. Eriktiler óz kezeginde, mundaı buzaqylyqqa jol bermeı, tabıǵatqa uqypty qaraýǵa shaqyrady.
«Ókinishke qaraı, demalýǵa baratyn azamattar qorshaǵan ortaǵa nemquraıly qaraıdy. Keıbireýler búginmen ómir súredi. Mysaly, plastıkalyq bótelke, polıetılen paket júzdegen jyldar boıy shirimeıdi, sonymen birge zııandy zattardy shyǵarady. Ata-babalarymyz ómir súrgen jerdi erteńgi urpaqqa taza qaldyra alamyz ba?»- deıdi Jarma aýdandyq aqsaqaldar keńesiniń tóraǵasy Erlan Qaıyrbekov.
Osylaısha, azamattar 1-2 saǵat ishinde Shar sý qoımasynyń jaǵasyn jınady. Bolashaqta uıymdastyrýshylar aýmaqty tazartýǵa múmkindiginshe kóp adamdy tartýdy josparlap otyr.
