Abaı oblysynda «Mereıli otbasy» baıqaýynyń jeńimpazdary anyqtaldy
ABAI. KAZINFORM – Semeıde ónegeli ómirimen urpaqqa úlgi bolyp júrgen otbasylardy ulyqtaýǵa arnalǵan «Mereıli otbasy» ulttyq baıqaýynyń oblystyq kezeńi jeńimpazdaryn marapattaý rásimi ótti. Saltanatty sharaǵa oblys ákimi Berik Ýálı qatysty, dep habarlaıdy Kazinform Abaı oblysy ákiminiń baspasóz qyzmetine silteme jasap.
«Mereıli otbasy» baıqaýy adamgershilik qundylyqtaryn jańǵyrtýǵa, otbasy mártebesin arttyrýǵa, ata-ananyń bala tárbıesindegi rólin aıshyqtaýǵa baǵyttalǵan. Baıqaý elimizde 2014 jyldan beri uıymdastyrylyp keledi.
Búginde Abaı oblysynda 198 526 otbasy bar. Onyń 18 983-i – kópbalaly otbasylar. Bıyl baıqaýǵa oblystyń qala-aýdandarynan 129 otbasy ótinish bildirip, olardyń 24-i oblystyq kezeńge joldama aldy.
– Bes jyl ishinde bul baıqaý ónegeli otbasylardyń basyn qosyp qana qoımaı, qoǵamǵa jaqsyny kórsetýge, izgilikti dáripteýge, otbasylyq qundylyqtardy jańǵyrtýǵa arnalǵan mańyzdy dástúrge aınaldy. Búgingi marapatty – Otannyń bir bóligi bolǵan otbasyna tárbıeniń tunyǵyn berip, baryn baqytym dep baǵalaǵan keń peıil, bala kóńilderińizge oblys jurtshylyǵynyń kórsetken qurmeti dep bilersizder. Yntymaǵy men yrysy artqan ár shańyraqqa baq qonyp, balanyń kúlkisi, sábıdiń syńǵyry úzilmesin. Mereıli otbasylardyń mereıi ústem bolyp, abyroıy arta bersin, – dedi Berik Ýálı.
Baıqaý qorytyndysy boıynsha I oryndy Besqaraǵaı aýdanynyń Qaıdarovtar otbasy ıelendi. II oryn Abaı aýdanynyń Maqaevtar otbasyna buıyrdy. III oryndy Aqsýat aýdanynyń Karjıkovtar otbasy men Jarma aýdanynyń Qumarovtar otbasy ıelendi.
Oblystyq kezeńde jeńimpaz atanǵan Qaıdarovtar otbasy respýblıkalyq kezeńge joldama aldy.
– Shyny kerek, osyndaı marapatqa ıe bolamyz dep oılaǵan joqpyz. 60 jyldan astam ýaqyt birge ómir súrip, urpaǵymyzdy tárbıelep kelemiz. Bul marapat – bizdiń otbasymyzǵa kórsetilgen úlken qurmet. Alǵysymdy bildiremin, – dedi bilim salasynyń ardageri, baıqaý jeńimpazy Jumaǵazy Qaıdarov.
Jeńimpazdar men júldegerlerge estelik syılyqtar jáne aqshalaı sertıfıkattar tabystaldy.
