Abaı oblysynda mektep oqýshylaryna arnalǵan jazǵy kásibı baǵdarlaý lagerleri ashyldy
SEMEI. KAZINFORM – Óńirde kolledjder bazasynda 10 jazǵy lager iske qosyldy. Onda oqýshylar túrli kásibı baǵyt boıynsha alǵashqy praktıkalyq tájirıbe alyp jatyr.
Oqý-aǵartý mınıstrligi málimetinshe, bıyl shamamen 600 balany qamtý josparlanǵan. Jańa formattaǵy lagerlerdiń biri — Besqaraǵaı kolledjiniń bazasyndaǵy ekologııalyq-agrarlyq «EKOorman» lageri. Munda balalar landshafttyq dızaın, jylyjaı sharýashylyǵy, florıstıka, aýyl sharýashylyǵyn mehanızatsııalaý negizderimen tanysady.
«SmartKriS» tsıfrlyq lageri IT jáne jańa tehnologııalar Joǵary kolledjiniń bazasynda jumys isteıdi. Ol eki aýysymda uıymdastyrylǵan. Oqýshylar robototehnıka, baǵdarlamalaý, veb-dızaın, CAD-grafıka baǵyttaryn meńgerip jatyr. Oqytý WorldSkills standarttaryna saı praktıkalyq tapsyrmalar men oıyn keısteri arqyly ótedi.
Polıtehnıkalyq kolledjde shyǵarmashylyq baǵyttaǵy «Summer Camp» lageri ashyldy. Baǵdarlama eki jas sanatyna bólingen. Balalar tiginshilikpen, aspazdyqpen aınalysyp, fetr men monshaqtan buıymdar jasaıdy, sheberlik saǵattaryna jáne sporttyq jarystarǵa qatysady.
Bıyl alǵash ret Úrjar kolledjinde «Úrjar-Aıym» lageri ashyldy. Munda aýyldyq mektep oqýshylary ustazdarymen birge agrarlyq is, veterınarııa, aspazdyq, dánekerleý jáne basqa da qoldanbaly baǵyttar boıynsha tájirıbe men sheberlik sabaqtarynan ótip jatyr.
R.Baıseıitov atyndaǵy Semeı qarjy-ekonomıkalyq kolledjinde SFEK Summer Camp lageri jumys isteıdi. Munda oqýshylar grafıkalyq dızaın, veb-ázirleý, býhgalterlik eseptiń negizderi jáne mobılografııany meńgeredi. Sondaı-aq kóshbasshylyq, komandada jumys isteý jáne taım-menedjment boıynsha trenıngter qarastyrylǵan.
Shákárim atyndaǵy Semeı joǵary kolledji «Tolaǵaı» lagerin iske qosty. Onda ulttyq mádenıet, ekologııa jáne densaýlyq taqyryptaryna basa nazar aýdarylǵan. Baǵdarlamada qoldanbaly óner, mýzyka, vıktorınalar, logıkalyq oıyndar qamtylǵan.
Elektrotehnıkalyq kolledj praktıkalyq baǵyttaǵy IT lagerin ashty. Oqýshylar startap-jobalarǵa, hakatondarǵa qatysyp, tsıfrlyq saladaǵy óndiristik protsesterdi meńgerip jatyr.
– Kásibı baǵdarlaý lagerleri – oqýshylardyń óz qabilet-qarymyn is júzinde baıqap kórýi jáne mamandyqtar týraly túsinik qalyptastyrýy úshin mańyzdy alańǵa aınaldy. Buǵan ásirese, Jumysshy mamandyqtary jyly aıasynda basymdyq berilip otyr. Osylaısha, kolledjder jastardyń áleýetin ashýǵa óz úlesin qosyp jatyr, – deıdi oblystyq Bilim basqarmasynyń basshysy Baýyrjan Týlenov.
Aıta keteıik, jazǵy kezeńde elimiz boıynsha jalpy 10 myńnan astam lager jumys istep, 3,2 mln bala demalyspen qamtyldy.
Túrkistan oblysynda alǵashqy modýldi lager jataqhanasy paıdalanýǵa berildi.