Abaı oblysynda medıtsınalyq jabdyqtarǵa qatysty zań buzý anyqtaldy

ASTANA. KAZINFORM — Memlekettik baqylaý aıasynda Abaı oblysyndaǵy aýdandyq aýrýhanalardyń birinde júrgizilgen tekseris kezinde mamandar mindetti tekseristen ótpegen ólsheý quraldarynyń qoldanylǵanyn anyqtady.

Bul — ólshemderdiń dáldigin qamtamasyz etý jáne densaýlyq saqtaý salasyndaǵy talaptardy óreskel buzý bolyp sanalady.

— Medıtsınalyq jabdyqty tekserý naýqastardyń qaýipsizdigi men ólsheýlerdiń dáldigin qamtamasyz etetin asa mańyzdy rásim. Bul protsedýra termometrler, tonometrler, ÝZI apparattary jáne basqa da dıagnostıkalyq qurylǵylar sekildi keń aýqymdy quraldardy qamtıdy. Tekserý barysynda jabdyqtyń metrologııalyq sıpattamalary men qoldanýǵa jaramdylyǵy anyqtalady, — delingen Tehnıkalyq retteý jáne metrologııa komıteti habarlamasynda.

Nusqamanyń oryndalý faktisin tekserý kezinde mekeme zań buzýdy joıý úshin naqty sharalar qabyldamaǵany, onyń ornyna jalǵan salystyryp tekserý sertıfıkattaryn usynǵany anyqtaldy.

Sot aýrýhanany Ákimshilik quqyq buzýshylyq týraly kodeksiniń 462-baby 3-bóligi boıynsha ákimshilik jaýapkershilikke tartty. Zań buzýdy joıýǵa jańa nusqama berildi. Burmalaý faktileri boıynsha materıaldar quqyq qorǵaý organdaryna jiberildi.

Aıta ketelik elde bıologııalyq belsendi qospalardyń aınalymyn baqylaý kúsheıtildi.