Abaı oblysynda máslıhat depýtaty 300 mln teńge jymqyrdy degen kúdikke ilindi

SEMEI.KAZINFORM – Abaı oblysy Aıagóz aýdandyq máslıhatynyń «AMANAT» partııasynan saılanǵan depýtaty, «QTJ – júk tasymaly» AQ-na qarasty jergilikti temirjol deposynyń bastyǵy Almas Janatqalıevke qatysty qylmystyq is qozǵaldy.

Aldyn ala málimet boıynsha, ol iri kólemdegi qarajatty jymqyrdy degen kúdikke ilingen. Keltirilgen shyǵyn mólsheri shamamen 300 mln teńge.

Bul aqparatty Abaı oblysy boıynsha ekonomıkalyq tergep-tekserý departamenti rastady.

– Qazirgi ýaqytta is departamentte qaralyp jatyr. Tergeýdiń múddesi men obektıvtiligin saqtaý maqsatynda basqa málimetter ázirge jarııa etilmeıdi, – delingen habarlamada.

Eske salsaq, Aqtóbe oblysynda sheneýnik pen depýtattar 672 mln teńge jymqyrdy degen kúdikke ilingeni habarlanǵan.