Abaı oblysynda mas veterınar ıt aýlaý kezinde qatygezdik kórsetken
ASTANA. KAZINFORM — Abaı oblysynyń polıtsııasy janýarlarǵa qatygezdik tanytqany úshin veterınarııalyq qyzmetkerdi jaýapkershilikke tartty.
Vedomstvo málimetinshe, 2026 jylǵy 19 aqpanda «102» arnasy arqyly polıtsııaǵa turǵyndardan ıtterdi atý faktisi týraly habarlama tústi. Oqıǵa ornyna polıtsııa qyzmetkerleri jedel túrde bardy. Júrgizilgen tekserý barysynda oqıǵaǵa qatysy bar tulǵa anyqtaldy.
— Ol — Abaı oblysy Veterınarııa basqarmasynyń janýarlardy aýlaý, ýaqytsha ustaý jáne joıý qyzmetiniń 58 jastaǵy qyzmetkeri. Anyqtalǵandaı, er adam azamattardyń ótinishi boıynsha kelgen. Alaıda janýarlardy aýlaý barysynda janýarlarǵa jaýapty ári izgilikpen qaraý týraly zańnama talaptaryn buzǵan. Sonymen qatar, ol qoǵamdyq orynda mas kúıinde bolǵan. Atalǵan quqyq buzýshylyqtar boıynsha azamat janýarlarǵa jaýapkershilikpen qaraý salasyndaǵy zańnamany buzǵany jáne qoǵamdyq orynda mas kúıinde júrgeni úshin ákimshilik jaýapkershilikke tartyldy, — delingen habarlamada.
Abaı oblysy Polıtsııa departamenti janýarlarǵa qatysty kez kelgen zańsyz áreketter turaqty baqylaýda ekenin jáne qoldanystaǵy zańnama aıasynda qaǵıdatty quqyqtyq baǵa beriletinin atap ótti.
Budan buryn kúshikterge qatygezdik tanytqan semeılik jaýapkershilikke tartylǵanyn jazǵanbyz.