Abaı oblysynda mas kúıde kólik aıdaǵan 370 júrgizýshi ustaldy
ASTANA. KAZINFORM — Abaı oblysynda ustalǵandardyń ishinde jeńil, júk kólikteri men mototsıkl, elektrosamokat tizgishileri de bar, dep habarlaıdy oblystyq Polıtsııa departamentiniń baspasóz qyzmeti.
Abaı oblysynda jol qaýipsizdigin qamtamasyz etý jáne mas kúıde kólik basqarý faktileriniń aldyn alý baǵytyndaǵy jumystar turaqty túrde júrgizilip keledi.
Jyl basynan beri oblys aýmaǵynda polıtsııa qyzmetkerleri kólik quralyn mas kúıde basqarǵan 370 júrgizýshiniń jolyn kesti. Onyń ishinde jeńil, júk kólikteri men mototsıkl, elektrosamokat tizgishileri de bar. Mundaı quqyq buzýshylyqtar jol qozǵalysyna qatysýshylardyń ómiri men densaýlyǵyna tikeleı qaýip tóndiredi.
Abaı oblysy PD Ákimshilik polıtsııa basqarmasynyń bastyǵy polıtsııa polkovnıgi Baýyrjan Omarovtyń aıtýynsha, mas kúıde kólik basqarý — júrgizýshiniń ǵana emes, joldaǵy ózge de azamattardyń ómirine qaýip tóndiretin óreskel quqyq buzýshylyq.
— Mas kúıde kólik basqarý — jaýapkershiligi joǵary júrgizýshi úshin jol berýge bolmaıtyn áreket. Kólik tizginindegi adamnyń bir sáttik jaýapsyzdyǵy orny tolmas qaıǵyǵa ákelýi múmkin. Sondyqtan polıtsııa qyzmetkerleri mundaı faktilerdiń jolyn kesýge jáne jol qozǵalysyna qatysýshylardyń qaýipsizdigin qamtamasyz etýge baǵyttalǵan jumystardy turaqty túrde júrgizip keledi, — dedi polıtsııa polkovnıgi Baýyrjan Omarov.
Polıtsııa departamenti júrgizýshilerdi jol qozǵalysy erejelerin qatań saqtaýǵa jáne kólik quralyn alkogoldik nemese ózge de mas kúıde basqarmaýǵa shaqyrady.
Buǵan deıin Astanada ushaq bortynda janjal shyǵarǵan mas jolaýshy 10 táýlikke qamalǵany belgili boldy.
