Abaı oblysynda qurylys alańynda qabyrǵa qulap, eki adam qaza boldy
SEMEI. KAZINFORM — Abaı oblysynyń Kýrchatov qalasynda salynyp jatqan nysan aýmaǵynda qabyrǵanyń bir bóligi qulap, úıindi astynan eki adamnyń máıiti tabyldy.
Aldyn ala málimetke sáıkes, oqıǵa 14 naýryz kúni dámhana qurylysy júrip jatqan jerde bolǵan. Qabyrǵa qulaǵannan keıin oqıǵa ornyna jedel qyzmet ókilderi jiberildi.
Abaı oblystyq polıtsııa departamenti bul derek boıynsha tergeý bastalǵanyn habarlady.
— Qurylys jumystaryn júrgizý kezinde qaýipsizdik talaptaryn buzý saldarynan abaısyzda eki nemese odan da kóp adamnyń ólimine ákelip soǵý faktisi boıynsha sotqa deıingi tergeý bastaldy. Qazirgi ýaqytta oqıǵanyń barlyq mán-jaıyn anyqtaýǵa baǵyttalǵan tergeý áreketteri júrgizilip jatyr, — dep habarlady vedomstvonyń baspasóz qyzmetinen.
Áleýmettik jelide qaza bolǵandar erli-zaıypty bolýy múmkin degen aqparat tarady. Alaıda bul málimet resmı túrde áli rastalǵan joq.
Oqıǵanyń mán-jaıy anyqtalyp jatyr.
Eske salsaq, buǵan deıin Jetisýdaǵy Altynkólde qutqarýshy qaza tapqany jaıly jazǵanbyz.
