Abaı oblysynda quny 2,7 mlrd teńge bolatyn zańsyz jetkizilgen temeki tárkilendi

Qarjylyq monıtorıng agenttiginiń Abaı oblysy boıynsha departamenti sáıkestendirý quraldarynsyz satýǵa arnalǵan túrli markaly temekini jetkizýdiń iri arnasyn anyqtady, dep habarlaıdy Kazinform agenttiktiń baspasóz qyzmetine silteme jasap.

Baspasóz qyzmetiniń málimetterine qaraǵanda, QMA departamenti atalmysh operatsııany polıtsııa QR UQK Shekara qyzmetimen birlesip júrgizgen.

Semeı qalasynyń aýmaǵynda júk avtokólik quraldary men qoımalardy tekserý barysynda 77,3 mln qorap kontrafaktilik temeki tabylyp, tárkilendi, olardyń naryqtyq quny 2,7 mlrd teńgeni quraıdy.

Memlekettik kirister departamentiniń qorytyndysyna sáıkes, bıýdjetke tólenýge jatatyn aktsızder somasy 1,1 mlrd teńge boldy.

Buǵan deıin Abaı oblystyq Polıtsııa departamentiniń UQQK-men birlesip, quny 1,1 mlrd teńge bolatyn kontrafaktilik temeki tasymaldaýdyń joly kesildi, ol boıynsha aktsızder somasy 450 mln teńgeni qurady.

Joǵaryda kórsetilgen faktiler boıynsha sotqa deıingi tergeý júrgizilýde, tergeý múddesine sáıkes ózge aqparat jarııalaýǵa jatpaıdy.

QR Konstıtýtsııasynyń 77-babynyń 3-tarmaǵynyń 1-tarmaqshasyna jáne QR Qylmystyq-protsestik kodeksiniń 19-babynyń 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árkim kinásiz dep esepteledi.