Abaı oblysynda krımınalıster qol iziniń kómegimen 92 qylmysty ashty
ASTANA.KAZINFORM - Bıylǵy 6 aıda Abaı oblysy Polıtsııa departamentiniń Jedel-krımınalıstıkalyq basqarmasy qyzmetkerleri qol izderiniń kómegimen 92 qylmysty ashty. Bul týraly oblystyq Polıtsııa departamenti jarııalady.
Sonymen qatar 73 jaǵdaıda krımınalıstıkalyq zertteýlerdiń nátıjeleri qylmysqa qatysy bar adamdardy anyqtap, isterdiń ashylýyna yqpal etti.
Qol izderi – qylmysty ashýdaǵy eń mańyzdy ári senimdi dálelderdiń biri. Olardy der kezinde anyqtaý, sapaly túrde alý jáne zertteý qylmys jasaǵan adamnyń jeke basyn anyqtaýǵa, onyń oqıǵa ornymen baılanysyn dáleldeýge múmkindik beredi.
Krımınalısterdiń kúndelikti eńbegi – dáldik, kásibılik jáne árbir bólshekke muqııat qaraý. Osyndaı jumystyń nátıjesinde qylmystar ashylyp, azamattardyń qaýipsizdigi qamtamasyz etiledi.
Aıta keteıik, krımınalıstıka – tarıhy tereń kúrdeli sala. Osy salada tabysty eńbek etip júrgen mamannyń biri – Qyzylorda oblystyq Polıtsııa departamenti jedel krımınalıstıka basqarmasynyń krımınalısi, polıtsııa podpolkovnıgi Jańabaı Saparbaev.
Qyzmette oǵan bala kúninen bergi sýret salýǵa áýestigi úlken kómek. Jańabaı Saparbaev kýágerler men jábirlenýshilerdiń sıpattaýymen arnaıy baǵdarlamalyq keshen arqyly kúdiktilerdiń beınesin jasap, qylmysty ashýǵa úles qosyp keledi.
