Abaı oblysynda kóshi-qon tártibin buzǵan 137 sheteldik elden shyǵaryldy

ASTANA. KAZINFORM — Olarǵa elimizdiń aýmaǵyna qaıta kirýge bes jylǵa deıingi merzimde tyıym salyndy, dep habarlaıdy Abaı oblysy PD baspasóz qyzmeti.

Abaı oblysy Polıtsııa departamenti turaqty túrde reıdtik is-sharalar uıymdastyryp, zańsyz kóshi-qonǵa tosqaýyl qoıyp keledi. Sonyń aıasynda elimizde bolý erejelerin buzǵan birqatar sheteldik azamat anyqtaldy.

— Abaı oblysynda jyl basynan beri ákimshilik isterdiń qorytyndysy boıynsha sot sheshimimen 100 sheteldik, «Ýchaske» jedel profılaktıkalyq is-sharasy aıasynda 37 azamat Qazaqstan Respýblıkasy aýmaǵynan shyǵarylǵan. Sonymen qatar, olarǵa elimizdiń aýmaǵyna qaıta kirýge bes jylǵa deıingi merzimde tyıym salyndy. Bul — elimizdiń kóshi-qon talaptaryn elemegender úshin qatań eskertý ǵana emes, mańyzdy sabaq, — delingen habarlamada.

Sonymen qatar profılaktıkalyq jumystarǵa da erekshe nazar aýdarylady.  Mıgratsııalyq qyzmet mamandary shetelden kelgen azamattarǵa Qazaqstan Respýblıkasynyń zańdaryn, atap aıtqanda, elimizde bolý tártibi, ýaqytyly tirkelý, eńbek qyzmetin júrgizý erejelerin saqtaý qajettigin únemi túsindiredi. Bul jumystar zań buzýshylyqtardyń aldyn alýǵa jáne quqyqtyq saýattylyqty arttyrýǵa baǵyttalǵan.

Budan bólek, kóshi-qon qyzmeti jumys berýshilermen kezdesýler ótkizip, sheteldik jumys kúshin zańdy túrde tartý joldaryn da túsindirip júr. Sheteldik azamattar turatyn nemese jumys isteıtin oryndarda tekseris júrgizilip, birlesken reıdter uıymdastyrylyp turady.

Osyǵan deıin Abaı oblysynda taǵy bir aýyl ishimdikten bas tartqany anyqtaldy.