Abaı oblysynda qorshaǵan ortany lastaǵandarǵa 52 mln teńgege jýyq aıyppul salyndy
SEMEI. KAZINFORM – Jyl basynan beri Abaı oblysynda qoǵamdyq oryndardy lastaǵany úshin 1316 adamǵa aıyppul salyndy.
Oblystyq Polıtsııa departamenti baspasóz qyzmetiniń málimetine súıensek, kósheni lastaǵandar ÁQBtK-niń 434-babyna (Ortaq paıdalanylatyn oryndardy lastaý) sáıkes ákimshilik jaýapkershilikke tartyldy.
Quqyqbuzýshylyqtar jedel basqarý ortalyǵynyń beınebaqylaý kameralary arqyly tirkeldi. Baqylaý júıeleri aýlalarda, jol boıynda, aıaldamalar men turǵyn úılerdiń mańynda ornatylǵan. Kameralardyń kómegimen polıtsııa qyzmetkerleri quqyqbuzýshylardy jedel anyqtap, tıisti shara qoldanyp jatyr.
— Beınebaqylaý júıelerin paıdalaný bizge quqyq buzýdy tirkep qana qoımaı, olardyń aldyn alýǵa da múmkindik beredi. Azamattardy tazalyqty saqtaýǵa jáne qorshaǵan ortaǵa qurmetpen qaraýǵa shaqyramyz, — deıdi PD jergilikti polıtsııa qyzmeti basqarmasynyń bastyǵy Áset Ótepov.
Halyq kóbine temeki tuqyly men qoqysty ruqsat etilmegen jerge tastaıdy. 3 aıda salynǵan aıyppuldyń jalpy somasy 51 mln 745 myń teńge boldy.
Eske salsaq, buǵan deıin ótken jyly respýblıkalyq joldardan 700 myń tonna qoqys jınalǵany habarlanǵan.