Abaı oblysynda kólik basqarý quqyǵynan aıyrylǵan adam qoǵamdyq avtobýs tizgindegen
ASTANA. KAZINFORM — Atalǵan fakti boıynsha quqyq buzýshyǵa qoldanystaǵy zańnama aıasynda tıisti sharalar qabyldanyp, avtobýs arnaıy aıypturaqqa qoıyldy, dep habarlaıdy Abaı oblysy PD baspasóz qyzmeti.
Abaı oblysynda jol qozǵalysy qaýipsizdigin qamtamasyz etý baǵytyndaǵy kezekti profılaktıkalyq is-shara barysynda óreskel quqyq buzýshylyq faktisi anyqtaldy.
— Atap aıtqanda, oblys aýmaǵynda ornalasqan Almaty — Aıagóz avtojolynyń Aıagóz — Úsharal baǵyty boıynsha 485-shaqyrymynda polıtsııa qyzmetkerleri «Setra» markaly avtobýsyn tekserýge toqtatqan. Kólik quralyn basqarǵan 38 jastaǵy azamattyń jeke basyn jáne qujattaryn tekserý barysynda onyń 2023 jyly sot sheshimimen 7 jyl merzimge kólik quralyn basqarý quqyǵynan aıyrylǵany belgili boldy. Soǵan qaramastan, júrgizýshi zań talaptaryn elemeı, qoǵamdyq kólik tizgindegen. Bul derek jol qozǵalysy erejelerin óreskel buzý ǵana emes, jolaýshylardyń jáne ózge de jol qozǵalysyna qatysýshylardyń ómiri men densaýlyǵyna tikeleı qaýip tóndiretin jaǵdaı bolyp esepteledi. Mundaı jaýapsyz áreketter qaıǵyly saldarǵa ákelýi múmkin ekeni belgili. Zań talaptaryn saqtaý — árbir azamattyń mindeti ǵana emes, adam ómirin qorǵaýdyń basty kepili, — delingen habarlamada.
Abaı oblysynyń Polıtsııa departamenti kólik quralyn basqarý quqyǵynan aıyrylǵan azamattardyń jolǵa shyǵýy zańǵa qaıshy ekenin jáne mundaı áreketter jol qozǵalysy qaýipsizdigine tikeleı qater tóndiretinin eskertedi.
— Kólik quralyn zańsyz basqarý aýyr quqyqtyq saldarǵa, sondaı-aq adam ómiri men densaýlyǵyna zııan keltirý qaýpine ákelýi múmkin. Osyǵan baılanysty barlyq júrgizýshini jol qozǵalysy erejelerin qatań saqtaýǵa, zań talaptaryn buzbaýǵa jáne óz jaýapkershiligin tereń sezinýge shaqyramyz, — delingen PD taratqan aqparatta.
Budan buryn Abaı oblysynda iz-túzsiz joǵalǵan bala qudyqtan tabylǵanyn jazǵan edik.