Abaı oblysynda qolaısyz aýa raıynda jolǵa shyqqan júrgizýshilerge aıyppul salyndy

SEMEI. KAZINFORM – Abaı oblysynda aýa raıynyń qolaısyzdyǵyna baılanysty engizilgen shekteýlerge qaramastan jolǵa shyǵyp ketken júrgizýshiler ákimshilik jaýapkershilikke tartyldy.

Oblystyq polıtsııa departamentiniń málimetine súıensek, kúrdeli meteorologııalyq jaǵdaı kezinde quqyq qorǵaý organdarynyń qyzmetkerleri kúsheıtilgen rejımde jumys istep jatyr.

Respýblıkalyq mańyzy bar kólik joldarynda qozǵalysqa 28 ret shekteý qoıylǵan. Onyń 27-si aýa raıy jaqsarǵannan keıin ýaqytyly alynyp tastalǵan. Sondaı-aq kólikterdi birrettik ótkizý boıynsha 17 ret ruqsat berildi. Al oblystyq mańyzy bar joldarda qozǵalys 14 ret shektelip, qosymsha eki ret birrettik ótkizýge ruqsat berilgen.

Alaıda keıbir júrgizýshiler joldardyń jabylýyna qatysty eskertýlerdi elemegen. 

- Polıtsııa qyzmetkeriniń zańdy talabyna baǵynbaǵany úshin 7 júrgizýshi ákimshilik jaýapkershilikke tartyldy. Olardyń 3-i sheteldik, 4-i Qazaqstan Respýblıkasynyń azamattary, - delingen aqparatta.

Tártip saqshylary mundaı áreketter adamdardyń ómiri men densaýlyǵyna tikeleı qaýip tóndiretinin jáne qolaısyz aýa raıy jaǵdaıynda jedel qyzmetterdiń jumysyn qıyndatatynyn atap ótti.

Eske salsaq, buǵan deıin Oralda mas kúıde avtokólik basqarǵan júrgizýshi qamaýǵa alynǵany habarlanǵan.