Abaı oblysynda qyzmettik ıtterdiń kómegimen jyl basynan 30-dan asa reıd júrgizildi
ASTANA. KAZINFORM — Abaı oblysynyń Esirtkige qarsy is-qımyl basqarmasy qyzmetkerleri el aýmaǵynda esirtkilik zattardyń zańsyz aınalymyna qarsy kúresti kúsheıtý maqsatynda birqatar reıdtik is-shara uıymdastyrdy.
Basqarmanyń málim etkenindeı, osy jumystar barysynda qyzmettik ıtter belsendi qatysyp, tıimdilik kórsetip keledi.
Reıdtik tekserýler aıasynda basqarma mamandary Qazposhta bólimderin jan-jaqty tekserdi. Bul is-sharalar halyqqa arnalǵan poshta qyzmetteri arqyly zańsyz zattardyń tasymaldanýyna jol bermeý úshin qolǵa alyndy. Qyzmettik ıtterdiń erekshe sezimtaldyǵy men kásibı daıyndyǵy tekserý jumystarynyń joǵary deńgeıde ótýin qamtamasyz etedi.
— Jyl basynan beri Abaı oblysy boıynsha 30-dan astam tekserý ótkizilgen. Árbir reıd tekserý júrgiziletin obektilerdiń zańdylyǵyn baqylaýmen shektelmeı, azamattardyń qaýipsizdigin qamtamasyz etýge de baǵyttalǵan, — delingen habarlamada.
Abaı oblysy Esirtkige qarsy is-qımyl basqarmasy qyzmetkerleri azamattardy zań buzýshylyqtardan saqtandyrý, qaýipti zattardyń taralýynyń aldyn alý jáne óńirde qoǵamdyq qaýipsizdikti nyǵaıtý jumystaryn júıeli túrde jalǵastyryp keledi. Qoǵamdyq oryndar men qyzmet kórsetý salasynda júrgizilgen reıdtik tekserýlerdiń tıimdiligi kún saıyn artyp keledi, al qyzmettik ıtterdiń qatysýy bul úrdisti anaǵurlym kásibı deńgeıge kóteriledi.
Osyǵan deıin Abaı oblysynda prokýratýra bızneske qatysty 60 zańsyz tekserýdi toqtatqanyn jazdyq.
