Abaı oblysynda qyzmettik ıtterdiń kómegimen 28 qylmys ashyldy

ASTANA. KAZINFORM — Abaı oblysynda qyzmettik ıtterdiń kómegimen 28 qylmys ashyldy. Aımaqta 21 ıt túrli baǵytta arnaıy daıyndyqtan ótken. Bul týraly ІІM baspasóz qyzmeti jarııalady.

Qoǵamdyq qaýipsizdikti qamtamasyz etý — kúndelikti nazar men jaýapkershilikti talap etetin mańyzdy mindet. Bul baǵytta polıtsııa qyzmetiniń árbir salasy óz úlesin qosyp, júıeli jumystar atqarýda. Solardyń biri — kınologııa qyzmeti.

— Búginde Abaı oblysynda 21 qyzmettik ıt túrli baǵytta arnaıy daıyndyqtan ótken. Esirtki zattaryn anyqtaýǵa úıretilgen qyzmettik ıtterdiń kómegimen 28 qylmys ashylyp, zańsyz áreketterdiń aldyn alýǵa múmkindik týdy. Bul kórsetkish — kınolog mamandardyń kásibı biliktiligi men qyzmettik ıtterdiń úzdiksiz daıyndyǵynyń nátıjesi, — delingen aqparatta.

Sonymen qatar jarylǵysh zattardy izdeýge mamandandyrylǵan qyzmettik ıtter qala jáne aýdan ortalyqtarynda ornalasqan 376 mekemede tekserý jumystaryn júrgizdi. Atalǵan sharalar azamattardyń qaýipsizdigin qamtamasyz etýge, tynysh ári turaqty qoǵamdyq ortany saqtaýǵa baǵyttalǵan.

Kınologııa qyzmetiniń jumysy — kóp jaǵdaıda kózge kórine bermeıtin, alaıda asa mańyzdy baǵyttardyń biri. Qyzmettik ıtter men kınologtardyń ózara úılesimdi áreketi, úzdiksiz daıyndyq pen jaýapkershilik qoǵamdyq qaýipsizdikti qamtamasyz etýdiń tıimdi tetigine aınalyp otyr.

Buǵan deıin Ulttyq ulanda qyzmettik ıtter 44 qylmysty ashýǵa kómekteskeni týraly jazdyq.