Abaı oblysynda qyzmetkerlerin rogatkamen atqan polıtsııa bastyǵy jumystan qýyldy
SEMEI. KAZINFORM — Abaı oblysy Jarma aýdanynyń Shar qalasyndaǵy polıtsııa bóliminiń bastyǵyna qatysty qyzmettik tergeý aıaqtaldy.

Buǵan deıin áleýmettik jelide beınebaqylaý kameralaryna jazylǵan vıdeo tarap ketken edi. Onda kóringendeı, polıtsııa bóliminiń bastyǵy qol astyndaǵy qyzmetkerlerin rogatkamen atyp, qýyp júrgen. Bul halyq arasynda qyzý talqyǵa tústi.
Abaı oblystyq Polıtsııa departamentiniń habarlaýynsha, vıdeodaǵy oqıǵa ujym ishindegi tımbıldıng kezinde bolǵan. Basshylyqtyń teris nıeti bolmaǵany anyqtalǵanymen, bul jaǵdaı qyzmettik etıka normalarynyń buzylýy retinde baǵalandy.
— Tártiptik komıssııanyń qorytyndysy boıynsha, Shar qalalyq polıtsııa bóliminiń bastyǵy Dáýren Áljaparov qyzmettik etıka talaptaryn buzǵany úshin atqaryp otyrǵan laýazymynan bosatyldy, — delingen aqparatta.
Eske salsaq, osyǵan deıin Óskemen qalalyq bilim bóliminiń basshysy sottalǵany habarlanǵan.