Abaı oblysynda qaýipti vıdeo túsirgen júrgizýshi men jolaýshy jaýapqa tartyldy
ASTANA. KAZINFORM – Abaı oblysynda qozǵalystaǵy kólikten denesin shyǵaryp, qaýipti vıdeo túsirgender ákimshilik jaýapkershilikke tartyldy, dep habarlaıdy polıtsııa departamenti.
Polıtsııa qyzmetkerleri áleýmettik jelilerge monıtorıng júrgizý barysynda qozǵalys kezinde jeńil avtokóliktiń terezesinen denesin shyǵaryp, qolyna gúl sebetin ustaǵan jolaýshy qyz beınelengen vıdeony anyqtady.
Tekserý nátıjesinde kólik júrgizýshisi men jolaýshynyń jeke basy anyqtaldy.
– 20 jastaǵy júrgizýshi jolaýshylardy tasymaldaý qaǵıdalaryn buzǵany úshin ákimshilik jaýapkershilikke tartyldy. Quqyq buzýshylyq bir jyl ishinde qaıtalanyp jasalǵandyqtan, is materıaly sotqa joldandy, – delingen habarlamada.
Sondaı-aq 21 jastaǵy jolaýshy qyz da qozǵalys kezinde kólik terezesinen denesin shyǵarǵany úshin ákimshilik jaýapkershilikke tartyldy. Onyń florıst bolyp jumys isteıtini belgili boldy.
Polıtsııa azamattardy kez kelgen jaǵdaıda jol qozǵalysy erejelerin qatań saqtaýǵa jáne qaýipsizdik talaptaryna jaýapkershilikpen qaraýǵa shaqyrdy.
Aıta keteıik, Qyzylordada jol erejesin óreskel buzýdyń 1300-den astam deregi tirkeldi.
