Abaı oblysynda kásip ashqysy keletin jastar 1 mln teńge grant utyp ala alady

Abaı oblysynda jastardy qoldaý maqsatynda «Zhas project» jobasy bastaldy, dep habarlaıdy Kazinform.  

Jobaǵa 18-35 jas aralyǵyndaǵy azamattar qatysyp, 1 mln teńge kóleminde memlekettik qoldaý grantyn jeńip, ózderiniń bıznes ıdeıalaryn júzege asyra alady.

Jobanyń aımaqtyq úılestirýshisi Elzıra Júnisovanyń aıtýynsha, respýblıkaǵa bólingen 28 granttyń 8-i Abaı oblysyna tıesili.

«Abaı jastary 8 mln teńge kólemindegi óteýsiz grant ala alady. Eskeretin jaıt, qarajat jer ýchaskeleri men belgili-bir jabdyqty satyp alýǵa jumsalatyn bolsa jobalar baǵdarlamaǵa qatysa almaıdy. Sondaı-aq ǵylymı zertteýler men qoljazbalar jazýǵa da qoldaý kórsetilmeıdi», - dedi Elzıra Júnisova.

Ótinim «Zhas project» saıtynda 9-22 qazan aralyǵynda qabyldanady. 23 qazannan tehnıkalyq irikteý júrgizilip, jeńimpazdar 1 qarashadan bastap anyqtalady.

Jobaǵa basynan aıaǵyna deıin mentorlar jetekshilik etedi.

Olardyń mindeti – grantqa qoly jetken qatysýshyǵa ártarapty qoldaý kórsetý, komandaǵa baǵyt-baǵdar silteý.

Grantty utyp alǵan jeńimpazdar onlaın-trenıngten ótedi.

Onda jumysqa ornalasý, áleýmettik kásipkerlik, kóshbasshylyq syńdy ómirlik mańyzdy daǵdylardy ıgeredi.

Joba talabyna sáıkes, Abaı oblysynyń aýmaǵynda turatyn, turaqty jumysy joq, halyqtyń áleýmettik osal toptaryna jatatyn QR azamattary qatysa alady.

Baǵdarlama eki kezeńnen turady – tehnıkalyq jáne konkýrstyq.

Komıssııa quramy 31 qazanǵa deıin barlyq ótinimderdi qarap, sheshim shyǵarady.