Abaı oblysynda Qarǵyba ózenindegi bógetti rekonstrýktsııalaý jobasy qaıta qolǵa alyndy
ASTANA. KAZINFORM - Sý resýrstary jáne ırrıgatsııa mınıstrligi Abaı oblysy Aqsýat aýdanyndaǵy Qarǵyba ózeniniń bógetin rekonstrýktsııalaý jumystaryn qaıta bastady, dep habarlaıdy mınıtsrliktiń baspasóz qyzmeti.
Bul joba 2021 jyly ony ázirleý kezinde ketken olqylyqtarǵa baılanysty toqtatylǵan bolatyn. 2023 jyly jobalaý-smetalyq qujattary qaıta qaralyp, túzetýler engizý bastaldy. Qazir nysanda qurylys-montaj jumystary júrip jatyr. Jospar boıynsha, jumystar kelesi jyldyń sáýir aıynyń sońyna deıin aıaqtalady.
Búgingi tańda úsh sý qaqpaǵy men burandaly kótergishter alynyp, qaıta ornatyldy. Bógettiń sý tasıtyn bóliginde armatýralyq torlar tolyq ornatylyp, beton quıý jumystarynyń 90 paıyzy aıaqtalǵan. Sonymen qatar ózenniń joǵarǵy bóligi laı men tunbadan tazartylyp, qosalqy bóget turǵyzylyp jatyr. «Qazaqstan» magıstraldy kanalynyń sý alý nysanynda da jóndeý jumystary qatar júrgizilip jatyr.
«Bul jobanyń maqsaty – «Jańa-Toǵan» kanalyna sýdy tıimdirek jetkizý, ózen túbindegi laı men shógindiniń sýǵa aralaspaýyn qamtamasyz etý jáne balyqtardyń qyrylýynyń aldyn alý. Al magıstraldy kanal men ondaǵy qurylystardy jóndeý sýdyń durys bólinýine, ysyraptyń azaıýyna jáne sýdy únemdep paıdalanýǵa múmkindik beredi», – dedi Sý resýrstary jáne ırrıgatsııa vıtse-mınıstri Erbolat Ibraıhanov.
Osyǵan deıin 2026 jyly Sý resýrstarynyń ulttyq aqparattyq júıesi iske qosylatyny týraly jazdyq.