Abaı oblysynda qaldyqtardy baqylaýdyń tsıfrlyq júıesi iske qosyldy
ASTANA. KAZINFORM – Abaı oblysynda ekologııalyq baqylaýdy tsıfrlandyrýǵa baǵyttalǵan «Qaldyqtar» avtomattandyrylǵan aqparattyq júıesi iske qosyldy.
Joba Memleket basshysynyń 2026 jyldy Tsıfrlandyrý jáne jasandy ıntellekt jyly dep jarııalaý týraly tapsyrmasy men «Taza Qazaqstan» jalpy ulttyq tujyrymdamasy aıasynda júzege asyrylyp otyr.
Óńirde uzaq ýaqyt boıy ózekti máselelerdiń biri – ruqsat etilmegen qoqys úıindileriniń kóbeıýi bolǵan. Bul jaǵdaı qaldyqtardy esepke alýdyń biryńǵaı júıesiniń bolmaýy jáne baqylaýdyń jetkiliksizdigimen baılanysty.
Osy máseleni júıeli sheshý úshin mamandandyrylǵan tabıǵat qorǵaý prokýratýrasynyń bastamasymen ýákiletti memlekettik organdar men «Semeı Tazalyq» JShS arasynda tórtjaqty memorandýmǵa qol qoıyldy.
Nátıjesinde memlekettik organdardy, operatorlardy jáne qadaǵalaý organyn biriktiretin «Qaldyqtar» aqparattyq júıesi ázirlenip, qoldanysqa engizildi.
Endi qoqysty jınaý, tasymaldaý jáne polıgondarǵa jetkizý protsesteri, sondaı-aq qoqys tasıtyn kólikterdiń qozǵalysy qashyqtan baqylanady.
– Júıege júrgiziletin turaqty monıtorıng qoqys úıindileriniń paıda bolý sebepterin der kezinde anyqtaýǵa jáne olardyń aldyn alýǵa múmkindik beredi, – dep atap ótti vedomstvo ókilderi.
Joba aıasynda prokýratýra tek qadaǵalaý organy retinde ǵana emes, taldamalyq jumystardyń belsendi qatysýshysy retinde de áreket etedi.
Mamandardyń aıtýynsha, «Qaldyqtar» júıesin engizý ekologııalyq baqylaýdy jańa deńgeıge kóterip, qaldyqtardy basqarý tıimdiligin arttyrýǵa múmkindik beredi.
Aıta keteıik, aýyldardaǵy qoqys máselesin sheshý úshin jeńildetilgen qarjylandyrý usynyldy.
