Abaı oblysynda ınternet arqyly 16 adamdy aldaǵan oraldyq alaıaq sottaldy

Tártip saqshylary páterlerdi táýliktik jalǵa berý týraly jalǵan habarlandyrýlar jarııalaýǵa baılanysty birneshe ret jasalǵan ınternet-alaıaqtyq faktileri boıynsha qylmystyq isti tergedi.

- Tergeý barysynda er adamnyń ınternet-platformalarda páterlerdi jalǵa berý týraly habarlandyrýlar ornalastyryp, ol úshin ınternettegi ashyq derekkózderden tabylǵan jyljymaıtyn múlik nysandarynyń fotosýretterin paıdalanǵany anyqtaldy. Klıenttermen sóılesý kezinde ol jalǵa alý sharttaryn habarlap, bir táýlik turý quny mólsherinde aldyn ala tólem jasaýdy talap etken. Aqshany alǵannan keıin alaıaq jábirlenýshilermen baılanysyn úzip, olardyń telefon nómirlerin buǵattaǵan, - dep habarlady Abaı oblystyq Polıtsııa departamentinen.

Aqshany qabyldaý jáne keıin qolma-qol aqshaǵa aınaldyrý úshin úshinshi tulǵalardyń bank shottary paıdalanylǵan.

Qylmystyq isti tergeý barysynda Qazaqstannyń ár túrli qalalarynan baspana jaldamaq bolǵan azamattarǵa qatysty alaıaqtyqtyń 16 deregi tirkelgen. Aıyptalýshy QR Qylmystyq Kodeksiniń 190-baby 3-bóligi, ıaǵnı ınternet paıdalanýshylaryn aldaý arqyly birneshe ret jasalǵan alaıaqtyq boıynsha kináli dep tanyldy.

- Semeı qalasynyń qylmystyq ister jónindegi aýdanaralyq sotynyń úkimimen sottalýshyǵa probatsııalyq baqylaý belgilene otyryp, 2 jyl 7 aı 15 kún merzimge bas bostandyǵynan shekteý jazasy taǵaıyndaldy. Sondaı-aq sot jábirlenýshilerge keltirilgen materıaldyq zalaldy óteý máselesin sheshti, - delingen aqparatta.

Eske salsaq, osyǵan deıin Astanada balabaqshadan oryn alyp berýge ýáde etken alaıaq 4 jylǵa sottalǵany habarlanǵan.