Abaı oblysynda ımam kólikpen qaǵyp ketken 11 jastaǵy qyz qaza boldy

SEMEI. KAZINFORM – Abaı oblysy Úrjar aýdanynda ımam kólikpen qaǵyp ketken 11 jastaǵy qyz aýrýhanada kóz jumdy. Qazir polıtsııa tergeý júrgizip jatyr.

Oqıǵa 14 qazanda saǵat 11:40 shamasynda Úrjar aýylynda bolǵan.

«Toyota Rav-4 markaly avtokólikti tizgindep kele jatqan 44 jastaǵy júrgizýshi Gagarın kóshesinde 11 jastaǵy qyzdy qaǵyp ketti. Bala Úrjar aýdanynyń ortalyq aýdandyq aýrýhanasynda qaza boldy», - dep habarlady Abaı oblystyq Polıtsııa departamentinen.

Qazirgi ýaqytta atalǵan fakti boıynsha sotqa deıingi tergeý amaldary júrgizilip jatyr. Kazinform tilshisi Abaı oblysynyń bas ımamy Asqar Muqanovqa habarlasyp kórdi. Ol júrgizýshiniń ımam bolǵanyn rastady.

«Úrjar aýyldyq meshitiniń ımamy abaısyzda jeke kóligimen jetkinshekti qaǵyp ketken. Onyń aıtýynsha, bir úıdiń aýlasynda baılanyp turǵan ıttiń úrgeninen shoshyǵan qyz jolǵa júgirip shyqqan. Sol kezde ózi 40-pen kele jatqan. Kólikti toqtatyp úlgermeı qalypty. Oqıǵa bolǵannan keıin qyzdy dereý aýrýhanaǵa ózi jetkizgen. Ókinishke qaraı, basymen asfaltqa qulaǵan bala ota ústinde qaza boldy. Búldirshinniń ata-anasy men týǵan týystaryna qaıǵylaryna ortaqtasyp kóńil aıtamyz. Qaryndasymyzdyń oqystan bolǵan qazasy bárimizdiń júregimizge aýyr batyp otyr», - dedi ol.

Imamnyń Úrjar aýyldyq meshitinde qyzmet etip kele jatqanyna 10 jyldan astam ýaqyt bolypty.

«Qyzmet barysynda onyń qandaı da bir tártip nemese ereje buzǵan jaǵdaılary kezdespedi. Bundaı oqys oqıǵa birinshi ret bolyp otyr», - dedi Asqar Muqanov.

Eske salsaq, osyǵan deıin Óskemende júrgizýshi kýáligine emtıhan tapsyrǵandardan 40 mln teńge syıaqy alǵan HQO qyzmetkerleri sottalǵany habarlanǵan.