Abaı oblysynda halyqty jumyspen qamtýǵa járdemdesý jobasy bastaý aldy
ASTANA. KAZINFORM — Abaı oblysynyń prokýratýrasy oblys ákimdigimen birlesip «Adal adam — Adal eńbek» jobasyn iske asyrýdy bastady.
Oblystyq prokýratýra baspasóz qyzmetiniń dereginshe, 24 sáýirde jumys berýshiler men jumysqa ornalasýǵa nıetti azamattar úshin dıalog alańy uıymdastyryldy. Іs-sharaǵa Semeı qalasynyń turǵyndary qatysty.
Qatysýshylar is-shara formatyn oń baǵalap, usynylǵan jumysqa ornalasý múmkindikterine qyzyǵýshylyq tanytty.
— Alań halyqty jumyspen qamtýǵa járdemdesýdiń tıimdi quralyna aınaldy. Bir kúnniń ishinde 50-den astam jumyssyz azamat oblys ortalyǵyndaǵy iri kásiporyndarǵa jumysqa ornalasýǵa joldama aldy. Olardyń qatarynda áleýmettik osal toptardan 10 azamat, probatsııa qyzmetiniń esebinde turǵan 21 azamat jáne alımenttik mindettemeler boıynsha 4 boryshker bar, — delingen vedomstvo habarlamasynda.
Joba aıasynda qatysýshylarǵa ózekti bos jumys oryndary, memlekettik qoldaý sharalary, sondaı-aq resmı túrde jumysqa ornalasý múmkindikteri usynyldy. Jobanyń iske asyrylýyn baqylaýdy oblys prokýratýrasy júzege asyrady.
Bastama halyqtyń jumyspen qamtylý deńgeıin arttyrýǵa, áleýmettik shıelenisti tómendetýge jáne zańdylyq pen quqyqtyq tártip qaǵıdattaryn nyǵaıtýǵa baǵyttalǵan.
Aldaǵy ýaqytta joba aıasynda osyndaı is-sharalar oblys prokýratýrasymen júıeli túrde ótkiziletin bolady.
Budan buryn Abaı oblysynda órttiń aldyn alýǵa arnalǵan jańa oqý-tájirıbelik keshen ashylǵanyn jazǵan edik.
