Abaı oblysynda fermer mal jaıýdy avtomattandyrdy
ASTANA. KAZINFORM – Abaı oblysyndaǵy «Daýren» sharýa qojalyǵy mal jaıý jáne sýmen qamtamasyz etý júıesin avtomattandyrýǵa baǵyttalǵan zamanaýı tehnologııalardy engizdi, dep habarlaıdy AShM.
Sharýa qojalyǵy 1994 jyly fermer Nurtýǵan Manaptyń bastamasymen qurylǵan. Búginde ol qazaqtyń aqbas tuqymdy iri qara malyn ósirýge mamandanǵan óńirdegi jetekshi asyl tuqymdy sharýashylyqtardyń biri.
Jalpy aýmaǵy 1 550 gektardy quraıtyn sharýashylyqta maldy avtomattandyrylǵan túrde jaıý júıesi engizilgen. Jaıylymnyń eki ýchaskesi elektr qorshaýlarymen, taǵy eki ýchaskesi berik topsaly qorshaýlarmen jabdyqtalǵan.
– Sonyń nátıjesinde mal baqtashylarsyz jaıylady. Maldy úzdiksiz aýyz sýmen qamtamasyz etý maqsatynda avtomattandyrylǵan sýmen jabdyqtaý júıesi ornatylǵan. Kún energııasymen jumys isteıtin tereńdik sorǵylary kún shyqqan kezde avtomatty túrde iske qosylyp, kúni boıy maldy taza sýmen qamtamasyz etedi, – delingen habarlamada.
Bıyl sharýashylyq dástúrli qaqpalardyń ornyna zamanaýı ınjenerlik sheshim – «Tehas qaqpalaryn» (Texas gate) ornatty. Bul júıe aýyl sharýashylyǵy tehnıkasynyń erkin qozǵalýyna múmkindik berip, maldyń jaıylym aýmaǵynan shyǵyp ketýine jol bermeıdi.
Qazirgi ýaqytta sharýashylyqta 802 bas asyl tuqymdy iri qara mal bar. Onyń ishinde 300-i – sıyr. Negizgi qyzmet baǵyty – joǵary genetıkalyq áleýetke ıe asyl tuqymdy tól ósirý jáne ótkizý.
Sharýashylyqtyń asyl tuqymdy maly respýblıkalyq jáne halyqaralyq kórmelerde turaqty túrde júldeger atanyp keledi.
– Óndiristik úderisterdiń avtomattandyrylǵanyna qaramastan, sharýashylyq aýyldyq jerde turatyn bes adamdy turaqty jumyspen qamtyp otyr. Sonymen qatar 19 birlik zamanaýı aýyl sharýashylyǵy tehnıkasy paıdalanylady.
Aldaǵy kezeńde óndiristik ınfraqurylymdy jańǵyrtý jumystary jalǵasady. 2026–2027 jyldary jaıylymdardy abattandyrý, maldy rotatsııalyq jaıý júıesin engizý jáne 200 shaqyrym qorshaý ornatý josparlanyp otyr, – dep jazdy AShM.
2027–2028 jyldary qoı sharýashylyǵyn damytý, sondaı-aq kún energııasyn paıdalaný arqyly sýdy kóterý jáne sýmen qamtamasyz etýdiń jańa avtomattandyrylǵan júıelerin engizý kózdelgen.
Sharýashylyqta ekologııalyq turaqtylyq máselelerine de erekshe kóńil bólinedi. Aldaǵy ýaqytta aýmaqty kógaldandyrý, jaıylym ónimdiligin arttyrý, kópjyldyq shóp egý jáne tabıǵı sý kózderin qalpyna keltirý josparlanǵan.
Aıta keteıik, 2026 jyly mal sharýashylyǵyn damytýǵa 300 mlrd teńgeden asa qarjy baǵyttaldy.
