Abaı oblysynda «Erlik – elge mura, urpaqqa uran» atty kitap kórmesi ótti
SEMEI. KAZINFORM – Uly Jeńistiń 80 jyldyǵy aıasynda «Erlik – elge mura, urpaqqa uran» taqyrybyndaǵy keń kólemdi ekspozıtsııalyq kitap kórmesiniń tanystyrylymy ótti.
Segiz bólimnen turatyn kórmede soǵys jyldarynyń syryn shertetin tarıhı derekter, ádebı-kórkem týyndylar men sırek kezdesetin basylymdar usynylǵan.
— Búgingi kórme — batyrlyq pen erliktiń máńgilik eskertkishi. Bul — uly tarıhymyzdy jańǵyrtyp, elge qorǵan bolǵan erlerimizdiń rýhyn jas urpaqqa jetkizýdiń taǵylymdy joly. Ásirese jas býynǵa el tarıhyn tanytý, patrıottyq sana qalyptastyrý turǵysynan mundaı sharalardyń mańyzy zor. Uly Otan soǵysy kezeńindegi baspasózdiń de erekshe ról atqarǵany atap ótkim keledi. Sol jyldary jarııalanǵan maıdandyq gazetter men aqparat quraldary sarbazdarǵa rýh berip, el ishindegi birlikti saqtaýǵa yqpal etti. Bul basylymdar tek aqparat kózi ǵana emes, halyqtyń úmitin jalǵaǵan rýhanı tirek boldy. Biz bul kórme arqyly urpaqtar sabaqtastyǵyn, otanǵa degen sheksiz súıispenshilikti, tarıhqa qurmetti nyǵaıtamyz, — dep atap ótti Abaı atyndaǵy oblystyq ámbebap kitaphanasynyń sırek basylymdar bóliminiń basshysy Jańylgúl Ádilbekqyzy.
Kórme «Qaharly kúnder jylnamasy», «Ónegeli ómir serııasy: Uly Otan soǵysyna qatysýshylar», «Soǵys taqyryby kórkem ádebıette», «Uly Jeńis jyrlary», «Otty jyldar áýenderi», «Ekinshi dúnıejúzilik soǵys jyldaryndaǵy kitaphana», «Soǵys beıneleý óneri», «UOS merzimdi baspasóz betterinde» dep atalatyn bólimderden turdy. Іs-shara barysynda qatysýshylar ardagerlerdiń estelikterine, maıdanger jazýshylardyń maqalalaryna erekshe qyzyǵýshylyq tanytty. Kórmede maıdanda bolǵan 125 qazaq jazýshysynyń, onyń ishinde Baýyrjan Momyshuly, Ádı Sháripov, Qasym Qaısenov, Ázilhan Nurshaıyqov pen Qasym Amanjolovtyń erligi men shyǵarmashylyǵy týraly derekter usynyldy.
— Búgin biz Jeńistiń 80-jyldyǵyna arnalǵan tarıhı kórmege qatysyp, halqymyzdyń sol bir qıyn-qystaý jyldary bastan keshken aýyr taǵdyryn, erlik pen tózimge toly kezeńderin jan-jaqty uǵynyp, tereńirek tanystyq. Kórme óte áserli ári mazmundy deńgeıde uıymdastyrylǵan. Osyndaı taǵylymy mol sharaǵa qatysý — bizge tek tarıhı derektermen tanysý múmkindigin ǵana emes, sonymen qatar ótkenniń ónegesin boıymyzǵa sińirýdiń biregeı joly boldy, — dep óz áserimen bólisti M.Áýezov atyndaǵy pedagogıkalyq kolledjiniń stýdenti Alınýr Serikov.
Kórme jyl boıy jalǵasyp, oqyrmandarǵa Uly Jeńistiń tarıhı mańyzyn, maıdangerlerdiń erligi men rýhanı murasyn tanystyrmaq.