Abaı oblysynda erekshe kútimdi qajet etetin balalarǵa 100-den astam ret zorlyq-zombylyq jasalǵan
ASTANA. KAZINFORM — Abaı oblysynyń Aıagóz aýdanyndaǵy arnaýly áleýmettik qyzmetter kórsetý ortalyǵynda erekshe kútimdi qajet etetin balalarǵa júıeli túrde fızıkalyq jáne psıhologııalyq zorlyq-zombylyq kórsetilgen. Prokýratýra tekserý barysynda 100-den astam derekti anyqtady.
Balalardyń quqyqtaryn qorǵaý maqsatynda oblys prokýratýrasy arnaýly áleýmettik qyzmetter kórsetý ortalyqtaryn tekserýge kiristi.
Aıagóz aýdanyndaǵy mekemeni tekserý kezinde sanıtarlardyń tárbıelenýshilerdiń dármensiz kúıin paıdalanyp, olarǵa kúsh kórsetip, psıhologııalyq qysym jasaǵany anyqtaldy.
Sonymen qatar prokýratýra mekemeniń keıbir qyzmetkerleri zańsyz áreketterdi kóre tura, olardyń jolyn kesýge eshqandaı shara qoldanbaǵanyn áshkereledi.
— Atalǵan fakti boıynsha Qazaqstan Respýblıkasy Qylmystyq kodeksiniń 140-babynyń 3-bóligimen sotqa deıingi tergep-tekserý bastaldy, — delingen habarlamada.
Tárbıelenýshilerdiń qaýipsizdigin qamtamasyz etý úshin iske qatysy bar adamdar qyzmettik mindetterin atqarýdan shettetilip, olardyń balalarmen baılanysýyna shekteý qoıyldy.
Prokýratýranyń málimetinshe, balalardyń quqyqtary men zańdy múddelerin qorǵaý, olardyń qaýipsizdigin qamtamasyz etý baǵytyndaǵy tekserý sharalary jalǵasyp jatyr.
Eske salaıyq, buǵan deıin Qazaqstanda zorlyq-zombylyqqa ushyraǵan balalarǵa kómek kórsetý kabınetteri ashylatynyn habarlaǵanbyz.
