Abaı oblysynda ekologııalyq talaptardy buzýdyń 7 myńnan asa deregi tirkeldi
ASTANA. KAZINFORM — Abaı oblysynda jyl basynan beri «Taza Qazaqstan» aktsııasy aıasynda 7300-den asa quqyqbuzýshylyqtyń joly kesildi, dep habarlaıdy oblystyq PD baspasóz qyzmeti.
Abaı oblysynda «Taza Qazaqstan» respýblıkalyq ekologııalyq bastamasy sheńberinde qoǵamdyq tártipti nyǵaıtý, qorshaǵan ortanyń tazalyǵyn saqtaý jáne eldi mekenderdiń sanıtarlyq ahýalyn jaqsartý baǵytynda keshendi ári aýqymdy jumystar turaqty túrde júzege asyrylyp jatyr.
2026 jyldyń basynan beri óńir aýmaǵynda jalpy sany 7368 quqyqbuzýshylyq dereginiń joly kesildi. Onyń ishinde:
- ortaq paıdalanylatyn oryndardy lastaý faktileri boıynsha — 601 derek;
- eldi mekenderdi abattandyrý qaǵıdalaryn buzý, ınfraqurylym nysandaryn búldirý jáne jasyl jelekterge zaqym keltirý syndy ekologııalyq talaptarǵa qaıshy áreketter boıynsha — 6797 derek.
Quqyqbuzýshylyqtardy anyqtaý jáne aldyn alý sharalary tek dástúrli baqylaý tetikterimen shektelmeı, zamanaýı dron tehnologııalaryn qoldaný arqyly da júzege asyrylady. Bul óz kezeginde baqylaý tıimdiligin arttyryp, jedel áreket etýge múmkindik berip otyr.
Sonymen qatar, óńirde profılaktıkalyq jumystarǵa erekshe kóńil bólinip otyr. Polıtsııa qyzmetkerleri turaqty túrde reıdtik is-sharalar ótkizip, monıtorıng júrgizý arqyly quqyq buzýshylyqtardyń aldyn alýǵa baǵyttalǵan júıeli sharalardy iske asyryp jatyr.
— Qoǵamdyq sanany qalyptastyrý maqsatynda sanıtarlyq talaptardy saqtaý, qoǵamdyq oryndardyń tazalyǵyn qamtamasyz etý jáne ekologııalyq jaýapkershilikti arttyrý boıynsha aqparattyq-túsindirý jumystary kúsheıtildi. Bul bastamalar azamattardyń tabıǵatqa uqypty kózqarasyn qalyptastyryp, ekologııalyq mádenıetti damytýǵa qyzmet etedi, — delingen vedomstvo taratqan aqparatta.
Buǵan deıin «Taza Qazaqstan» aktsııa aıasynda SQO-da prokýratýra ekologııalyq zańbuzýshylyqtardy anyqtaǵanyn jazdyq.
