Abaı oblysynda dropperlikke qatysty 40 qylmystyq is tirkelip, 9 adam sottaldy

ASTANA. KAZINFORM – Abaı oblysynda jyl basynan beri dropperlikke qatysty 40 qylmystyq is tirkelip, 9 adam sottalǵan. Polıtsııa azamattarǵa ońaı tabys tabý týraly usynystardyń artynda qylmystyq shema jasyrynýy múmkin ekenin eskertti, dep habarlady Polisia.kz.

Dropperlık: oson pýl topıshnıng havfları nımada
Kollaj: Kazinform / JI

Quqyq qorǵaý organdarynyń málimetinshe, alaıaqtar azamattarǵa bank kartalaryn paıdalanýǵa berýdi nemese óz shottaryna túsken aqshany basqa shottarǵa aýdarýdy usynyp, sol úshin syıaqy ýáde etedi.

Osylaısha qaskúnemder qylmystyq jolmen alynǵan qarajatty aýdarýǵa jáne qolma-qol aqshaǵa aınaldyrýǵa kómektesetin adamdardy óz áreketterine tartady. Mundaı adamdar dropperler dep atalady.

Polıtsııa kúmándi qarjylyq operatsııalarǵa qatysý qylmystyq jaýapkershilikke ákelýi múmkin ekenin eskertedi.

Abaı oblysynda 2026 jyldyń basynan beri dropperlikke baılanysty 40 qylmystyq is tirkelgen. Osy ister boıynsha 9 adam sottalǵan.

Quqyq qorǵaý organdary azamattardy qosymsha tabys tabý týraly kúmándi usynystarǵa saqtyqpen qaraýǵa shaqyrady.

– Polıtsııa eskertedi: bank kartalaryńyzdy, jeke derekterińiz ben SMS-kodtardy bógde adamdarǵa bermeńiz. Beıtanys adamdardyń aqshasyn syıaqy úshin aýdarýǵa kelispeńiz. Eger bank shotyńyzdyń zańsyz operatsııalarǵa paıdalanylyp jatqanyn baıqasańyz nemese oǵan qoljetimdilikti basqa adamǵa berip qoıǵan bolsańyz, dereý bankke, «102» nómiri arqyly polıtsııaǵa málimdeńiz, – delingen habarlamada.

Mamandar bank kartasyn nemese mobıldi bankıngke qoljetimdilikti basqa adamǵa berý qarjylyq alaıaqtyq shemasyna qatysý qaýpin arttyratynyn eskertedi.

Sondyqtan óz shotyna beıtanys adamdardan aqsha qabyldap, ony syıaqy úshin basqa shottarǵa aýdarýǵa kelispeý qajet.

Eger azamat bank shotynyń zańsyz operatsııalarǵa paıdalanylyp jatqanyn baıqasa, dereý bankke habarlasyp, polıtsııaǵa júginýi tıis.

Aıta keteıik, buǵan deıin Qazaqstanda dropperlik úshin qylmystyq jaýapkershilik engizilgeni habarlanǵan bolatyn. 2025 jylǵy 16 qyrkúıekten bastap Qylmystyq kodekstiń 232-1-baby kúshine endi. Zań boıynsha mundaı áreketter úshin aıyppuldan bastap, múlkin tárkileı otyryp, 7 jylǵa deıin bas bostandyǵynan aıyrý jazasy qarastyrylǵan.