Abaı oblysynda dropperlikke qatysty 40 qylmystyq is tirkelip, 9 adam sottaldy
ASTANA. KAZINFORM – Abaı oblysynda bıyl dropperlikke qatysty 40 qylmystyq is tirkelip, toǵyz adam sottalǵan. Osyǵan baılanysty polıtsııa qyzmetkerleri qarjylyq alaıaqtyq shemalaryna tartylǵan adamdardy anyqtaý joldaryn túsindirdi, dep habarlaıdy Polisia.kz.
Hat almasýda – ońaı tabys tabý týraly ýáde, bank shotynda – beıtanys adamdardan túsken aqsha. Qarjylyq alaıaqtyq shemasyn uıymdastyrýshylar jalǵan esimderdiń artynda jasyrynýy múmkin. Alaıda urlanǵan qarajat aýdarylatyn bank shoty naqty adamnyń atyna tirkeledi.
Aqsha qozǵalysy alaıaqtyq qylmystardy tergeýdegi mańyzdy baǵyttardyń biri sanalady. Polıtseıler jábirlenýshiniń qarajaty qaıda aýdarylǵanyn, alýshy shotynyń kimge tıesili ekenin jáne aqshanyń odan ári qaıda jiberilgenin anyqtaıdy. Bank aýdarymdaryn, shot ıeleri týraly málimetterdi jáne ózge de materıaldardy taldaý arqyly qarjylyq tizbekke qatysy bar adamdardy tabady.
Degenmen bank shotynyń kimniń atyna tirkelgeni istiń barlyq mán-jaıyn ashýǵa jetkiliksiz. Tergeý barysynda shotty is júzinde kim paıdalanǵany, oǵan qandaı jaǵdaıda qol jetkizgeni jáne shot ıesiniń árekettegi róli anyqtalady. Osy maqsatta bank kartalaryn berý jaǵdaılary, qosymsha tabys týraly hat-habarlar, syıaqy alý jáne basqa da derekter tekseriledi.
Abaı oblysy polıtsııa departamenti ázirlegen áleýmettik beınerolıkte osy másele kóterilgen. Ondaǵy basty eskertý – óz shoty arqyly bóten aqshany qabyldap, ony basqa adamdarǵa syıaqy úshin aýdarý qylmystyq shemaǵa qatysýǵa ákelýi múmkin.
Polıtseıler bógde adamdardyń ótinishimen bank kartasyn rásimdeýge, bank qosymshasyna qoljetimdilikti berýge nemese syıaqy úshin aqsha aýdarýǵa kelispeýge shaqyrady. «Qosymsha tabys» retinde usynylǵan mundaı áreketterdiń artynda urlanǵan qarajatty aýdarý shemasy turýy múmkin.
– Eger bank shotyńyzǵa nemese kartańyzǵa bógde adamdardyń qol jetkizgenin baıqasańyz, dereý bankke habarlasyp, polıtsııaǵa 102 nómiri arqyly málimdeý qajet, – dep jazdy Polisia.kz.
Aıta keteıik, buǵan deıin Tarazda TikTok úshin trotýarmen júrgen júrgizýshi jazalanǵanyn habarladyq.