Abaı oblysynda Degeleń stantsııasynyń vokzaly qaıta jańǵyrtýdan keıin ashyldy
ASTANA. KAZINFORM - Abaı oblysynda Degeleń stantsııasynyń temirjol vokzalyn qaıta jańǵyrtý jumystary aıaqtaldy. Nysandy jańartý Memleket basshysynyń tapsyrmasy boıynsha júzege asyrylyp jatqan temirjol vokzaldaryn jańǵyrtý jónindegi aýqymdy baǵdarlama aıasynda júrgizildi.
Degeleń stantsııasynyń temirjol vokzaly 1953 jyly salynǵan. Qaıta jańǵyrtý aıasynda ǵımarat jolaýshylarǵa qolaıly jaǵdaı jasaý, qaýipsizdik pen qyzmet kórsetý sapasyna qoıylatyn zamanaýı talaptardy eskere otyryp, tolyqtaı jańartyldy.
Qurylys-montaj jumystary barysynda nóldik tsıkl qurylysy, ǵımarat qańqasyn turǵyzý, syrtqy jáne ishki árleý sharalary jasaldy. Kólik mınıstrligi málimetinshe, sýmen jabdyqtaý jáne káriz jelileriniń syrtqy ınjenerlik júıeleri, sondaı-aq ishki ınjenerlik kommýnıkatsııalar jańartyldy.
Degeleń stantsııasynyń vokzaly II sanatty vokzaldarǵa jatady. Stantsııa arqyly Semeı, Astana, Beıneý, Mańǵystaý, Almaty, Pavlodar, Qaraǵandy jáne Qandyaǵash baǵyttarymen qatynaıtyn 8 jolaýshylar poıyzy ótedi.
Vokzaldy qaıta jańǵyrtý jolaýshylarǵa qyzmet kórsetý sapasyn arttyrýǵa, jaıly ári qaýipsiz jaǵdaı jasaýǵa, sondaı-aq temirjol ınfraqurylymy nysanynyń syrtqy kelbetin jaqsartýǵa baǵyttalǵan.
Aıta keteıik, Qazaqstanda 124 temirjol vokzaly jańǵyrtylyp jatyr. Kólik mınıstrliginiń málimetinshe, jumys tek ǵımarattardyń syrty men ishin jóndeýmen shektelmeıdi. Jańǵyrtý kezinde vokzaldar jolaýshylarǵa qaýipsiz ári yńǵaıly bolatyndaı etip jańartylady.
