Abaı oblysynda bir kúnde 306 júrgizýshi jol erejesin buzǵan
ASTANA. KAZINFORM — Abaı oblysynda «Qaýipsiz jol» sharasy barysynda 89 júrgizýshi beldik taqpaǵany anyqtaldy, dep habarlaıdy oblystyq Polıtsııa departamentiniń baspasóz qyzmeti.
Abaı oblysynda jol-kólik oqıǵalarynyń aldyn alý, jol qozǵalysy qaýipsizdigin qamtamasyz etý jáne júrgizýshilerdiń kólik tártibin arttyrý maqsatynda 10–12 tamyz aralyǵynda «Qaýipsiz jol» jedel-profılaktıkalyq is-sharasy ótip jatyr.
Іs-shara barysynda oblys aýmaǵynda polıtsııa qyzmetkerleri jol qozǵalysy erejeleriniń saqtalýyna kúsheıtilgen baqylaý júrgizip, jol qaýipsizdigine tikeleı áser etetin quqyq buzýshylyqtardy anyqtaýǵa erekshe nazar aýdaryp otyr.
Bir táýlik ishinde polıtsııa qyzmetkerleri 306 quqyq buzýshylyqtyń jolyn kesti.
Atap aıtqanda:
- jolaýshylardy, bagajdy jáne júkterdi tasymaldaý qaǵıdalaryn buzý — 4;
- Jolaýshylardy, bagajdy nemese júkterdi avtomobılmen tasymaldaýdy júzege asyrý kezinde júrgizýshilerdiń eńbek jáne demalys rejıminiń buzylýy — 7;
- memlekettik tirkeý nómirlik belgisinsiz nemese belgilengen tártippen tirkelmegen kólikti basqarý — 14;
- tehnıkalyq reglament talaptaryna sáıkes kelmeıtin kólik quraldaryn basqarý — 74;
- tıisti ruqsatsyz kólik quralyn qaıta jabdyqtaý — 8;
- memlekettik nemese mindetti tehnıkalyq baıqaýdan ótpegen kólikti basqarý — 21;
- kólik quralyn basqarý kezinde telefon nemese radıostantsııa paıdalaný — 60;
- jolaýshylar men júkterdi tasymaldaý, qaýipsizdik beldikterin nemese motoshlemderdi paıdalaný talaptaryn saqtamaý — 89;
- qarsy qozǵalys jolaǵyna shyǵý — 2;
- kólik quralyn mas kúıinde basqarý — 2;
- kólik basqarý quqyǵy joq adamnyń kólik quralyn basqarýy — 9;
- kólik basqarý quqyǵynan aıyrylǵan adamnyń kólik quralyn basqarýy — 5 fakt.
Ákimshilik polıtsııa basqarmasynyń bastyǵy polıtsııa polkovnıgi Baýyrjan Omarov júrgizýshilerdi jol qozǵalysy erejelerin qatań saqtaýǵa shaqyrady.
— Jol qaýipsizdigi — tek polıtsııanyń emes, árbir jol qozǵalysyna qatysýshynyń ortaq jaýapkershiligi. Bir qaraǵanda bolmashy bolyp kórinetin erejeni buzýdyń ózi aýyr zardapqa ákelýi múmkin. Sondyqtan júrgizýshilerden belgilengen jyldamdyq rejımin saqtaýdy, qaýipsizdik beldigin taǵýdy, kólik basqarý kezinde telefon qoldanbaýdy jáne mas kúıinde rólge otyrmaýdy suraımyz. Basty maqsatymyz — jazalaý emes, jol-kólik oqıǵalarynyń aldyn alyp, adam ómiri men densaýlyǵyn qorǵaý, — dedi polıtsııa polkovnıgi Baýyrjan Omarov.
Budan buryn Abaı oblysynda sanıtarlyq talaptardy buzǵandarǵa qatysty 7 786 hattama toltyrylǵany belgili.
