Abaı oblysynda byltyrǵy orman órtiniń zardabyn joıý úshin ınvestorlar tartylyp jatyr
SEMEI. KAZINFORM – Abaı oblysynda byltyrǵy orman órtiniń zardabyn joıý maqsatynda ınvestorlardy tartýdyń jol kartasy ázirlendi.
Aımaq basshysy Nurlan Uranhaev qytaılyq «Luyi Country Hongyao Furniture Co.Ltd» kompanııasy ókilderimen kezdesti. Atalǵan kompanııa álemge jıhaz jasaýmen tanymal.
Oblys ákimdigi byltyrǵy orman órtiniń zardaptaryn joıý maqsatynda ınvestorlardy tartýdyń jol kartasyn ázirlegen. Jol kartasy QR Ekologııa jáne tabıǵı resýrstar mınıstrliginde bekitilgen.
«Luyi Country Hongyao Furniture Co.Ltd» kompanııasynyń tóraǵasy Lý ıÝntsıýan kezdesý barysynda kompanııanyń múmkindigi jaıly aıtyp, Abaı oblysynda jumys isteýge múddeli ekenin jetkizdi.
«Qytaıda aǵash taqtaıshalar, korpýstyq jáne jumsaq jıhaz óndirisimen aınalysamyz. Ónimderimiz Eýropa, Soltústik Amerıka jáne Birikken Arab Ámirlikterine eksporttalady. Endigi maqsatymyz – «Ýnıversal SM» JShS-men birlesip, Semeıde aǵash óńdeý keshenin qurýdy jáne ishki naryq úshin aǵash taqtaıshalar, korpýstyq jáne jumsaq jıhazdardy óndirý jáne olardy Orta Azııa men Qytaı elderine saýdalaý», - dedi kompanııa tóraǵasy Lý ıÝntsıýan.
Qazirgi ýaqytta «Ýnıversal SM» JShS ınvestıtsııalyq joba sheńberinde Semeı qalasynyń ındýstrııalyq aımaǵynda LDSP, MDF materıaldary men jıhaz óndirýmen aınalysatyn aǵash óńdeý kombınatynyń qurylysyn bastaýdy josparlap otyr. Kombınat óz ónimderin kórshiles elderge eksporttamaq.
«Biz oblysqa ınvestıtsııa quıǵysy keletin ınvestorlar úshin árdaıym ashyqpyz. Zań sheńberinde qoldaý bildirýge de ázirmiz. Bıznestegi áriptestik eki el arasyn jaqyndastyryp qana qoımaı, jańa jumys oryndarynyń ashylýyna, kásiptegi básekelestikti arttyrýǵa yqpal etedi. Óńirimizde qurylys belsendi júrgizilip jatyr. Osyǵan sáıkes aǵash ónimderine suranys artady dep oılaımyn», - dedi oblys ákimi.
Kezdesý barysynda qytaılyq tarap ózderin tolǵandyrǵan saýaldardy qoıyp, jaýap aldy. Aımaq basshysy orynbasarlary men basqarma basshylaryna tıisti tapsyrmalar júktedi.
