Abaı oblysynda bıyl jol apatynan 85 adam qaza tapty
ASTANA. KAZINFORM — Abaı oblysynda jol apatynan zardap shekkender sany 800-ge jýyqtady, dep habarlaıdy oblystyq Polıtsııa departamentiniń baspasóz qyzmeti.
Dúnıejúzilik jol-kólik oqıǵalary qurbandaryn eske alý kúni qarsańynda Abaı oblysynda eske alý sharasy uıymdastyryldy. Іs-sharaǵa Polıtsııa departamentiniń, Tótenshe jaǵdaılar departamentiniń, jedel medıtsınalyq járdem qyzmetiniń, «QazAvtoJol» UK» AQ ókilderi, sondaı-aq jastar qozǵalysynyń eriktileri qatysty.
Іs-sharaǵa qatysýshylar jol-kólik oqıǵalary saldarynan qaza tapqan azamattardy bir mınýt únsizdikpen eske alyp, olardyń týǵan-týystary men jaqyndaryna qoldaý bildirdi.
Shara barysynda jol qozǵalysy qaýipsizdigin qamtamasyz etý, jol-kólik oqıǵalarynyń aldyn alý jáne jol-kólik oqıǵalarynyń saldaryn joıý kezinde jedel qyzmetterdiń ózara is-qımyly máselelerine erekshe nazar aýdaryldy.
— Ókinishke qaraı, jol-kólik oqıǵalarynyń tirkelýi óńirdegi ózekti máselelerdiń biri bolyp otyr. 2026 jyldyń basynan beri Abaı oblysynyń aýmaǵynda 515 jol-kólik oqıǵasy tirkelgen. Saldarynan 85 adam qaza taýyp, 784 adam túrli dene jaraqatyn alǵan. Árbir sannyń artynda adam taǵdyry, otbasy jáne jaqyndarynan aıyrylǵan jandardyń qaıǵysy tur, — deıdi tártip saqshylary.
Vedomstvo ókilderi jol qozǵalysyna qatysýshylardy muqııat ári jaýapkershilikpen bolýǵa, jol qozǵalysy erejelerin saqtaýǵa jáne jol qaýipsizdigi árqaısymyzǵa baılanysty ekenin umytpaýǵa shaqyrdy.
Buǵan deıin Temirtaýda avtobýs aǵashqa soǵylyp, júrgizýshisi kóz jumǵanyn jazǵanbyz.
