Abaı oblysynda belsendi jastar marapattaldy
Abaı oblysynyń ákimi Nurlan Uranhaev óńir jastarymen kezdesti. Olardyń qatarynda jastar resýrstyq ortalyǵynyń basshylary men mamandary, belsendi jastary men eriktiler bar, dep habarlaıdy Kazinform.
Jıyn barysynda jastar saıasaty men kreatıvti ındýstrııany damytýǵa, jastar lageri men jastar ortalyǵyn qurýǵa baǵyttalǵan bastama talqylandy. Oblys ákimi búginde jergilikti atqarýshy bılik tarapynan jastar úshin barynsha qajetti jaǵdaı jasaýǵa baǵyttalǵan jumystar júrgizilip jatqanyna toqtaldy. Sapaly bilim alý múmkindigin berý, jumysqa ornalasý jáne kásibı turǵyda ósý úshin jaǵdaı jasaý basty nazarda.
«Mundaı kezdesýler dástúrli jáne ashyq bolýy kerek. Biz kreatıvti ındýstrııany damytýǵa jáne jastardyń shyǵarmashylyǵyn shyńdaýǵa jaǵdaı jasaımyz. Sizderdiń ıdeıalaryńyz ben usynystaryńyz bizdiń ortaq bolashaǵymyzdy qalyptastyrýda sheshýshi ról atqarady. Mundaı kezdesýler áli de jalǵasyn tabýy kerek, men sizderdiń bastamalaryńyzdy talqylaýǵa árqashan ashyqpyn», – dedi Nurlan Uranhaev.
Kezdesý barysynda stýdenttik teatrdy damytý jáne jas ǵalymdarǵa qoldaý kórsetý ıdeıasy da ortaǵa salyndy.
Jıyn sońynda oblys ákimi belsendi jastarǵa Alǵys hattar tabys etti. Nurlan Uranhaev oblys jastarynyń aldaǵy ýaqytta da bıikterden kórinip, tabysqa jetetinderine senim bildirip jáne óńirdiń zamanaýı ımıdjin qalyptastyrýdaǵy jastar róliniń mańyzdylyǵyn atap ótti.
Aıta keteıik, oblysta 11 jastar resýrstyq ortalyǵy jumys isteıdi. Jyl basynan beri olar qumar oıynǵa táýeldilik pen sybaılas jemqorlyqpen kúresýge baǵyttalǵan 7000-nan astam keńes berip, 700-den astam is-shara ótkizdi. Mundaı sharalarǵa barlyǵy 30 myńǵa jýyq adam qatysty. Sondaı-aq aýdan jastarymen de júıeli kezdesýler ótkizilip turady.
