Abaı oblysynda balasyna 44 mln teńge alıment tólemegen adam Reseı azamattyǵyn alyp alǵan

SEMEI. KAZINFORM – Abaı oblysynda balasyna alıment tólemegen adam Reseıden tabyldy. Onyń balasyna qaryzy 44 mln teńgege jetken.

Kýrchatov qalasynyń polıtseılerine azamattyq sot oryndaýshysynan balalaryna alıment boıynsha 44 mln teńgeden astam qaryzy bar azamatty izdeý týraly qaýly tústi. 

«Tártip saqshylary jedel-izdestirý jumystaryn bastady. Sonyń barysynda kóshi-qon qyzmeti boryshkerdiń ornalasqan jerin anyqtady. Ol qazirgi ýaqytta Barnaýl qalasynda turatyn 40 jastaǵy azamat bolyp shyqty», - dep habarlady oblystyq polıtsııa departamentinen.

Belgili bolǵandaı, alıment tóleýden jaltarǵan er adam Reseı Federatsııasynyń azamattyǵyn alyp alǵan. Endi áıel adam burynǵy kúıeýinen alıment óndirý úshin halyqaralyq quqyqtyq mehanızmderge júginbek. Ol Mınsk jáne Kıshınev konventsııalaryna sáıkes alımentti óndire alady.

Eske salsaq, osyǵan deıin ShQO-da alıment tólemegen adam alǵash ret túrmege qamalǵany habarlanǵan.