Abaı oblysynda balabaqsha qyzmetkerleriniń derbes derekteri tarap ketken
ASTANA. KAZINFORM — Kýrchatov qalasynyń prokýratýrasy memlekettik satyp alý salasyna júrgizilgen taldaý barysynda qaladaǵy balabaqshalardyń biriniń 75 qyzmetkeriniń derbes derekteriniń taralýyna baılanysty zańnama buzýshylyqtaryn anyqtady. Bul týraly óńirlik prokýratýra málim etti.
— Bilim berý mekemesi qyzmetkerlerdi merzimdik medıtsınalyq tekserýden ótkizý boıynsha konkýrs jarııalaý kezinde ashyq qoljetimdilikke qyzmetkerlerdiń tolyq saýalnamalyq derekterin, JSN-in jáne ózge de qupııa aqparatty qamtıtyn tizimdi ornalastyrǵan, — delingen habarlamada.
Qoljetimdiligi shekteýli aqparatqa qoljetkize alatyn tulǵalar onyń qupııalylyǵyn qamtamasyz etýge mindetti jáne derbes derekterdi sýbektiniń kelisiminsiz nemese zańdy negizdersiz taratýǵa quqyly emes.
Mekeme basshylyǵy tarapynanatalǵan talaptardyń saqtalmaýy derbes aqparattyń quqyqqa qaıshy maqsattarda paıdalanylý qaýpin týyndatqan. Prokýratýra qabyldaǵan sharalar nátıjesinde kórsetilgen buzýshylyqtar joıylyp, kináli laýazymdy tulǵa QR ÁQBtK 79-baby 2-bóligi (Qazaqstan Respýblıkasynyń derbes derekter jáne olardy qorǵaý týraly zańnamasyn buzý) boıynsha 432 500 teńge mólsherinde aıyppul salýmen ákimshilik jaýaptylyqqa tartyldy.
Abaı oblysynyń prokýratýrasy azamattardyń quqyqtary men zańdy múddelerin qorǵaý boıynsha jumysty jalǵastyra beredi.
Aıta keteıik, buǵan deıin Pavlodarda 2 myńnan astam bilim berý qyzmetkeriniń derekteri tarap ketken edi.
