Abaı oblysynda baqylaýsyz mal máselesin sheshýde drondar tıimdiligin kórsetti
ASTANA. KAZINFORM — Abaı oblysynda drondar maldyń baqylaýsyz jaıylýyna baılanysty jol-kólik oqıǵalaryn azaıtýǵa kómektesip jatyr, dep habarlaıdy oblystyq PD baspasóz qyzmeti.
Aýyldyq aımaqtardaǵy jol qaýipsizdigine áser etetin negizgi máselelerdiń biri — maldyń baqylaýsyz jaıylýy. Qaraýsyz qalǵan janýarlar jıi jol-kólik oqıǵalaryna sebep bolyp, júrgizýshiler men jolaýshylardyń ómirine naqty qaýip tóndiredi.
Abaı oblysynda bul máseleni sheshý úshin zamanaýı tehnologııalar belsendi túrde engizilip jatyr. Aýdan ákimdikteriniń qoldaýymen jergilikti polıtsııa bólimsheleri patrýldik qyzmet barysynda aýmaqty turaqty baqylaýǵa jáne avtojol mańynda erkin jaıylyp júrgen maldy jedel anyqtaýǵa múmkindik beretin drondarmen jabdyqtaldy. Joǵary ajyratymdylyqtaǵy kameralary bar pılotsyz ushý apparattary maldyń ornalasqan ornyn naqty ýaqyt rejıminde kórsetip, tez áreket etýge jaǵdaı jasaıdy.
Mysaly Jańasemeı aýdanynda júrgizilgen profılaktıkalyq reıdter barysynda 59 bas jylqy anyqtalyp, arnaıy turaqqa jetkizildi. Baqylaýsyz júrgen mal — Semeı — Óskemen jáne Omby — Maıqapshaǵaı baǵyttaryndaǵy qozǵalysy úlken joldarda jıi kezdesetin qaýip kózderiniń biri. Drondardy qoldaný bul táýekelderdi aıtarlyqtaı tómendetip, óńirdegi jol qaýipsizdigi deńgeıin jaqsartýǵa múmkindik berip otyr.
— Statıstıka da qabyldanyp jatqan sharalardyń tıimdiligin rastaıdy: bıylǵy jyldyń basynan beri polıtsııa qyzmetkerleri maldyń baqylaýsyz jaıylýyna qatysty 2 284 quqyq buzýshylyqty anyqtaǵan. Arnaıy aıypturaqtarǵa 9 729 bas mal qoıylyp, olardyń ıeleri Ákimshilik quqyq buzýshylyq týraly kodekstiń 408-baby boıynsha jaýapkershilikke tartyldy. Sonymen qatar aýyl sharýashylyǵy janýarlaryn sáıkestendirý talaptarynyń buzylýyna qatysty 201 derek tirkelip, materıaldar veterınarııalyq ınspektsııaǵa joldandy, — delingen departament taratqan aqparatta.
Vedomstvo atap ótkendeı, zamanaýı tehnologııalardy profılaktıkalyq sharalarmen ushtastyrý polıtsııaǵa oqys oqıǵalardyń aldyn alýǵa ǵana emes, mal ıeleriniń jaýapkershilik mádenıetin arttyrýǵa da múmkindik beredi. Osyndaı keshendi tásil Abaı oblysynyń joldaryn barlyq qatysýshylar úshin anaǵurlym qaýipsiz etedi.
Buǵan deıin polıtsııa drondary myńdaǵan quqyqbuzýshylyqty áshkerelegenin jazǵan edik.