Abaı oblysynda azyq-túlik baǵasynyń negizsiz ósýine qarsy baqylaý sharalary kúsheıtildi

ASTANA. KAZINFORM — Abaı oblysynda áleýmettik mańyzy bar azyq-túlik taýarlarynyń negizsiz qymbattaýyn anyqtaý baǵytynda monıtorıng jumystary júıeli túrde júrgizilip keledi, dep habarlaıdy 

Monıtorıng toptary kásipkerlerdiń baǵany zań talaptaryna qaıshy túrde kóterý jaǵdaılaryn tirkep otyr.

Kezekti tekserister barysynda saýda ústemesiniń belgilengen normadan asyp ketkeni birneshe ret anyqtaldy. Semeı qalasynda jeke kásipker «Barskıe» tuzyn 108 teńgeden satyp alyp, 150 teńgeden satqan. Bul saýda ústemesiniń 39 paıyzǵa jetýine sebep boldy jáne belgilengen 15 paıyzdyq shekti eki eseden astam asyrdy.

Áleýmettik pavılondardyń birinde de zańbuzýshylyq tirkeldi. Qaraqumyq jarmasy 175 teńgeden, «Aqmarjan» kúrishi 350 teńgeden satyp alynǵanymen, satý baǵasy tıisinshe 220 jáne 440 teńge bolǵan. Saýda ústemesi 25,8 paıyzdy qurap, talaptardyń tikeleı buzylýyna ákeldi. Tekserý qorytyndysy boıynsha kásipkerlerge aıyppul salyndy.

Kýrchatov qalasynda Departament mamandary zańbuzýshylyqtyń qaıtalanǵanyn anyqtady. Kásipker «Barakat» kúrishin 480 teńgeden alyp, 580 teńgeden satý arqyly 20,9 paıyzdyq ústeme qoldanǵan. Nátıjesinde oǵan 19 660 teńge kóleminde aıyppul taǵaıyndaldy.

Departament satýshylardyń dúken sórelerinde naqty jáne durys baǵa belgileriniń bolýyn qamtamasyz etýge mindetti ekenin eskertedi. Baǵasy kórsetilmegen, qate kórsetilgen nemese teńgemen belgilenbegen taýarlar boıynsha da ákimshilik jaýapkershilik qarastyrylǵan. Jyl basynan beri osy talaptardyń buzylýyna baılanysty 17 ákimshilik qaýly shyǵarylyp, jalpy somasy 480 myń teńge aıyppul salyndy. Monıtorıng jumysy tek saýda nysandarymen shektelmeıdi. Memlekettik kirister departamentimen birlesip, elektrondy shot-faktýralarǵa taldaý júrgiziledi. Bul mehanızm áleýmettik mańyzy bar taýarlardyń qozǵalysyn baqylaýǵa, artyq deldaldyq býyndardy anyqtaýǵa jáne negizsiz qymbattaýǵa jol bermeýge múmkindik beredi.

— Áleýmettik mańyzy bar azyq-túlik taýarlary baǵasyn turaqtandyrý — memlekettik saıasattyń negizgi basymdyqtarynyń biri. «Saýda qyzmetin retteý týraly» Zańnyń 9-babyna sáıkes, mundaı taýarlarǵa saýda ústemesi 15 paıyzdan aspaýy tıis. Bul talapty buzǵany úshin Ákimshilik quqyq buzýshylyq týraly kodekstiń 204-4-baby boıynsha shaǵyn kásipkerlik sýbektilerge 5 AEK, orta bızneske 35 AEK, iri kásipkerge 150 AEK aıyppul salynady. Bir jyl ishinde talapty qaıta buzǵan jaǵdaıda aıyppul somasy eki esege artady, — dep eskertti mınıstrlik.

Jyl basynan beri Abaı oblysynyń Saýda jáne tutynýshylardyń quqyqtaryn qorǵaý departamenti saýda ústemesin 15 paıyzdan artyq qoldanǵany úshin jalpy somasy 856 myń teńgeni quraıtyn 119 ákimshilik qaýly qabyldady. Turǵyndardy qoljetimdi taýarlarmen qamtamasyz etý jáne olardyń quqyqtaryn qorǵaý maqsatynda baqylaý sharalary aldaǵy ýaqytta da jalǵasady.

Osyǵan deıin Premer-mınıstrdiń orynbasary — Ulttyq ekonomıka mınıstri Serik Jumanǵarın Úkimet otyrysynan keıin ótip jatqan baspasóz máslıhatynda jylqy eti áleýmettik mańyzy bar taýarlardyń qataryna enýi múmkin ekenin aıtty.