Abaı oblysynda azyq-túlik baǵasyn negizsiz ósirgen kásipkerlerge shara qoldanyldy
ASTANA. KAZINFORM - Abaı oblysynda áleýmettik mańyzy bar azyq-túlik taýarlarynyń baǵasyn negizsiz kóterý faktileri anyqtaldy.
Aıagóz aýdanynyń prokýratýrasy áleýmettik mańyzy bar azyq-túlik taýarlaryna baǵa belgileý salasyndaǵy zańnamanyń saqtalýyna, sondaı-aq jergilikti atqarýshy organdardyń baǵa turaqtylyǵyn qamtamasyz etý boıynsha jumysyna taldaý júrgizdi.
Anyqtalǵandaı, mundaı 31 taýar túriniń 10 pozıtsııasy boıynsha kásipkerler ónimderdi shekti baǵadan joǵary baǵamen satqan. Sonymen qatar, jergilikti atqarýshy organdar tarapynan tıisti baqylaý qamtamasyz etilmegen.
Aýdan prokýratýrasynyń qabyldaǵan sharalary nátıjesinde baǵany turaqtandyrý jumystary jandandy, monıtorıng kúsheıtildi, kásipkerlermen taýar baǵasyn negizsiz kótermeý boıynsha túsindirý jumystary júrgizilip jatyr.
Sonymen qatar, dúkenderdiń birimen ónimderdi shekti baǵadan 10–15% tómen baǵamen satý týraly kelisimge qol jetkizildi.
Úsh dúken ıesi belgilengen baǵadan 15%-dan astam asyryp satqandyǵy úshin ákimshilik jaýaptylyqqa tartyldy.
Aıta ketelik AShM azyq-túlik baǵasy respýblıkalyq deńgeıden joǵary óńirlerdi ataǵan edi.
