Abaı oblysynda ajyrasqandar sany artty

SEMEI. KAZINFORM — Abaı oblysynda bir jylda ajyrasqandar sany 5 paıyzǵa artyp otyr.

Óńirde ótken jyly AHAT organdary 3452 nekeni tirkegen. Bul onyń aldyndaǵy jylmen salystyrǵanda 7,4%-ǵa az. 

«Aýdan, qalalar arasynda Semeı turǵyndary otbasyn kóbirek qurǵan. Al eń tómengi deńgeı Abaı aýdanynda. Otbasyn qurǵandardyń ishinde birinshi ret nekege turǵan erlerdiń úlesi — 75,7%, áıelder sany — 75,1%. Ajyrasqandar arasynda qaıta nekege turý úlesi erlerde — 22,6%, áıelderde — 22,1%» dep habarlady Abaı oblysy ákimdiginen.

Qalalarda 2452 neke (71%), aýyldarda 1000 neke (29,0%) tirkeldi. Alǵash ret nekege turǵandardyń ortasha jasy erler úshin — 28,1, áıelder úshin — 25,5 jas. 

«Tirkelgen nekelerdiń 86,6%-y monoetnıkalyq, ıaǵnı bir ult arasyndaǵy juptardyń otasýy, al qalǵan 13,4% — etnosaralyq. Ajyrasýǵa keletin bolsaq, olardyń sany aldyńǵy jylmen salystyrǵanda 5,4% kóbeıip, 1514 qurady. Qalalarda 1148 ajyrasý (75,8%), aýyldarda 366 ajyrasý (24,2%) tirkelgen» delingen aqparatta. 

Ajyrasýdyń eń joǵary deńgeıi — Kýrchatov qalasynda, al eń tómeni — Abaı aýdanynda. 

Neke uzaqtyǵy boıynsha ajyrasýdyń eń kóp úlesi (29,5%) nekede 5-9 jyl ómir súrgen otbasylar arasynda, 18,7%-y 10-14 jyl birge otasqandar arasynda bolǵan.